Umento sa suweldo giyamar

SunStar File
SunStar File

MOLUSAD ang Regional Tripartite Wages and Productivity Board-Davao Region (RTWPB-Davao) sa Department of Labor and Employment (DOLE) og pagdungog sa publiko sa petisyon alang sa pag-umento sa minimum nga suholan o suweldo sa rehiyon.

Base sa notisya sa pagdungog nga gipirmahan ni abogado Randolf Pensoy, RTWPB-Davao chairperson ug DOLE-Davao director, ang pagdungog himuon sa Abril 19 pinaagi sa video conferencing.

Ang pagdungog maoy tubag sa "wage adjustment of the daily minimum wage" sa mga trabahante sa pribadong sektor nga gisang-at sa duha ka grupo.

Ang una mao ang petisyon nga gisumite sa United Pantaron Banana Workers Union-Association of Democratic Labor Organization-Kilusang Mayo Uno (UPBWU-Adlo-KMU) niadtong Abril 20, 2021, nga naghangyo og P100 nga umento sa suweldo sa matag minimum nga suholan alang sa mga trabahante sa pribadong sektor gawas lang sa negusyo nga nagpatrabaho og ubos sa 10 ka tawo.

Ang ikaduhang petisyon mao ang gikan sa Trade Union Congress of the Philippines (TUCP) nga gisumite niadtong Marso 24, 2022, nga naghangyo og P418 nga umento sa suholan.

Ang kasamtangan nga "daily minimum wage" sa rehiyon naa sa P396.

Ang pagdungog tambongan sa mga trabahante sa pribadong sketor ug mga domestic workers.

Sa miaging taho sa SunStar Davao, gisulti ni UPBWU president Jay Panague nga ang grupo nangayo og P100 nga umento sa matag adlaw nga suholan sa minimum wage earners sa agrikultura ug non-agricultural sectors sa Davao.

Matud ni Panague nga ang umento niini nalangay na alang sa mga trabahante kay ang katapusang pagpahaum sa minimum wage sa rehiyon niadtong pang Pebrero 16, 2019.

Iyang giangkon nga ang P100 umento di paigo sa batakang panginahanglan sa pamilya, apan alibyo na kini ngadto sa gma trabahante. Kon matugtan, gisulti niini nga makaabag na kini sa nawala nga balor sa ilang suweldo tungod sa way puas nga pagsaka sa mga presyo.

Gikanayon ni PJ Dizon, tigpamaba sa KMU-Southern Mindanao Region, nga ang P396 minimum wage sa rehiyon nawad-an na og balor tungod sa padayong pagsaka sa mga presyo sa palaliton.

Gipahimug-atan pa niini nga sumala sa pagduki-duki sa Ibon Foundation, ang pamilya nga dunay lima ka miyembro nagkinahanglan og mga P1,057 matag adlaw nga kita aron nga matubag ang ilang batakang panginahanglan ug magpuyo nga maligdong.

Samtang ang TUCP nagbutyag sa gipadalang pahayag nga ang poverty incidence sa rehiyon nagpabilin nga naglabi tungod sa ubos nga suholan ug kita sa mga trabahante ug ang ilang pamilya.

Subay sa 2021 First Semester Poverty Incidence Among Families nga gipagawas sa Philippine Statistics Authority (PSA), ang poverty incidence naa sa 7.9 porsiyento sa Davao del Sur; 13.6 porsiyento sa Davao del Norte; 24.5 porsiyento sa Davao Oriental; 31.7 porsiyento sa Davao Occidental; ug 21.8 porsiyento sa Davao de Oro.

Base sa 2021 datus sa kagamhanan, gisulti sa TUCP nga ang P13,619 matag bulan mao ang "poverty threshold" alang sa rehiyon, itandi sa kasamtangan nga minimum wage nga P10,296 lang matag bulan, nga dunay "purchasing power" nga P9,242.37.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph