Human sa kapin sa tulo ka mga tuig, mihayag na ang kahigayunan nga mahitabo ang world title rematch tali ni Japanese Kazuto Ioka ug Filipino Donnie Nietes.
Kini human gimanduan sa World Boxing Organization (WBO) ang kampo ni Ioka (28-2, 15 KOs) sa pagdepensa sa iyang junior bantamweight title batok kang Nietes (43-1-6, 23 KOs), kinsa maoy iyang kasamtangang mandatory challenger.
Sa premirong away niadtong 2018, gipildi ni Nites si Ioka pinaagi sa split decision aron langkaton ang WBO title.
Apan pipila lang ka mga buwan ang milabay human naangkon ni Nietes ang titulo, iyaha kining gibuhian nga nakasurpresa sa kadaghanan.
Ang maong kalambuan maoy naghatag og dalan ni Ioka nga maangkon ang bakus pinaagi sa pagpukan sa laing Pinoy world contender nga si Aston Palicte.
Gitagalan sa WBO og 30 ka mga adlaw ang mga kampo nila ni Ioka ug Nietes aron mahan-ay ang ilang panagharong og balik ug malikayan ang purse bid nga magsugod sa minimum nga $100,000 nga premyo.