USA ka lola nakuhaan og P1 milyon kapin nga cash ug alahas sa tulo ka mga babaye nga mangingilad.
Ang insidente nagsugod sa Brgy. Bolinawan, dakbayan sa Carcar, alas 10:00 sa buntag, kagahapon, Abril 6, apan ang kwarta nakuha sa mga suspek sa Barangay Poblacion Ward 4, lungsod sa Minglanilla.
Ang tulo ka mga babaye nagpailang Taiwanese national, sakay sa usa sakyanan ug lalaki ang drayber niini.
Si Police Major William Homoc, hepe sa Minglanilla Police Station, nagkanayon nga nangayog abag ang biktima sa ilang buhatan.
Gibutyag sa biktima nga nagsakay siya sa traysikol ug nagdala og kapin sa P200,000 aron iyang ideposito sa PNB Carcar.
Ang duha ka mga suspek nga babaye sakay sab sa samang traysikol. Usa niini, nangayo og pakitabang kay mopalit silag 50 ka sin aron ilang i-donate sa mga nabiktima sa bagyong Odette.
Ang biktima nadala sa gipangsulti sa mga suspek.
Usa ka suspek nitawag sa iyang ig-agaw nga babaye nga magpakuha sa sakyanan. Naabot kini ug nikuyog ang biktima kay mamalit og sin sa Minglanilla.
Pag-abot sa dakbayan sa Naga, nihunong sila kay mo-withdraw ang duha og P3.5 milyon sa PNB Naga.
Niawhag ang mga suspek sa biktima nga mo-withdraw usab og P500,000.
Ang biktima gipakita sab sa kapin P3 milyunes. Nideretso sila sa Minglanilla, usa ka suspek nihisgot og Feng Shui.
Nadala siya sa awhag nga ibutang ang ilang kwarta, ingon man alahas sa bag.
Ug pag-uli niya sa ilang balay, nakurat siya kay pulos papel ug boodle money ang sud sa iyang bag.