(UPDATED) PAG-VALIDATE ra unta ang tumong sa mga operatiba sa City Drug Enforcement Unit (CDEU) sa Cebu City Police Office sa ilegal nga kalihukan sa biktima didto sa Sitio Sidlakan, Barangay Tisa, siyudad sa Sugbo apan ang naulahi mihana og sukol ngadto sa mga pulis hinungdan sa iyang hinanaling kamatayon.
Ang biktima nailhan nga si Ralph Tejares, 22 anyos, taga Sitio Mahayahay dan A. Lopez, Barangay Calamba, siyudad sa Sugbo.
Nasayran nga si Ralph nibunot unta og pistola dayon'g pusil sa pulis apan naunhan siya sa naulahi nga miresulta sa iyang pagkamatay.
Nahitabo ang maong insidente pasado alas 10 sa gabii sa Miyerkules, April 6, 2022, samtang ang grupo ni Police Major Jonathan Bethoven Taneo, pangu sa CDEU, naglakaw sa nahisgutang lugar aron pagsuta sa ilegal nga kalihukan sa suspek.
Ang Scene of the Crime Operatives (SOCO) nakarekober og kabhang sa bala sa wala masuta nga armas ug mga binulto sa shabu nga gibana-bana'ng moabot og kapin sa tunga sa kilo nga mobalor og P3.6 milyones subay sa street value. (BBT, TPT)