MOABOT na sa 98 ka mga tawo ang nadakpan sa kapulisan sa probinsya sa Sugbo nga nakalapas sa Comelec gun ban sukad nagsugod ang election period niadtong Enero 29, 2022. Kasagaran nadakpan sa checkpoint pasulod ug pagawas sa dakbayan sa Sugbo.
Sa datus nga gipahibawo ni Police Colonel Engelbert Soriano, hepe sa Cebu Police Provincial Office (CPPO), nga nakasakmit silag 108 sa nagkalainlaing matang sa mga armas, 20 ka deadly weapons sama sa kutsilyo ug uban pa ug 149 ka mga bala.
Kasagaran kanila nadakpan sa subsub nga Comelec checkpoints sa kadalanan ilabi na sa dakbayan sa Danao, Talisay ug Consolacion nga gikan sa probinsya nga mosulod sa dakbayan sa Sugbo ug ang kadtong mosulod sa mga lungsod.
Samtang sulod lang sa usa ka semana nga anti criminality and law enforcement operation, nakadakop ang CPPO og 29 ka mga tawo nga nalambigit sa illegal nga drugas sa ilang 17 ka anti drug operations nga niresulta usab sa pagka sakmit sa 260 gramos sa gituohang shabu nga mobalor og P1.8 milyones.
Nakadakop silag 40 ka personalidad nga adunay mga warrant of arrest, pito niini nalakip sa listahan sa most wanted persons ug 33 ang adunay mga pending nga kaso sa korte.
Nakalusad usab silag 11 ka operations sa illegal gambling nga niresulta sa pagkasikop sa 29 ka mga tawo nga kasagaran nga sugal mao ang tigbakay.
Pasabot ni Soriano nga nidaghan ang nag-operate sa tigbakay sa mga lungsod tungod usab sa pagloag na sa restriction human gipaubos na sa alert level 1 ang tibuok lalawigan ug wala nay kahadlok ang mga tawo.