NAGTINGKAGOL na sa selda sa kapulisan sa Digos City Police Station ang usa ka gituohang drug pusher kinsa maoy giilang ika-7 sa drug watchlist sa Davao Region atol sa buy-bust operation alas 10 sa gabii, Abril 5, 2022, didto sa Purok Mansanitas, Aurora Extension, Barangay San Miguel, Digos City.

Ang suspek giila sa Digos City police nga si alyas Bay, 31-anyos, ug residente sa Purok San Francisco, Luna Ext., Barangay San Miguel.

Sumala sa kapulisan sa Digos nga usa ka notadong drug pusher sa Davao del Sur ang suspek.

Atol sa operasyon, nakuha sa posisyon sa dinakpan ang mga pakite sa gituohang shabu nga mokantidad sa P3,600 ug ang marked money.

Usa ka high-value target ang suspek sanglit giingong empleyado kini sa gobyerno subay sa mga dokumento nga nahipos sa awtoridad atol sa operasyon.

Gikasohan na ang suspek didto sa korte.