GIPASAKAAN na og kaso kagahapong adlawa ang usa ka lalaki nga nadakpan sa awtoridad human nasakpan nga miitsa og mga pakite sa gituohang shabu pasulod sa Davao City Jail alas 4 sa kaadlawon niadtong Miyerkules, Abril 6, 2022.
Ang suspek nailhang si alyas Mon, 24-anyos, kinsa nagpositibo sa gihimong drug test kaniya.
Sumala sa report, nasiplatan ang suspek sa mga jailer nga duty, hinungdan nga gisita kini.
Sa pagsuta, upat ka mga pakite sa gituohang shabu nga gilingin ug gibalot sa itom nga electrical tape.
Ang nakumpiska nga shabu dunay gibug-aton nga 15 gramo ug dunay street value nga P270,000.
Gikasohan na ang suspek didto sa korte.