USA ka giingong suspek sa pagpayuhot og gidiling drugas ang gisusi sa kapulisan apan giingong nisuway sa pagsukol pinaagi sa pagbunot sa armas hinungdan nga giunhan pagpusil ug namatay.
Kini ang giasoy ni Police Major Jonathan Bethoven Taneo, pangulo sa a City Drug Enforcement Unit (CDEU) sa Cebu City Police Office (CCPO), bahin sa resulta sa ilang operasyon sa Sityo Sidlakan, Barangay Tisa, siyudad sa Sugbo niadtong Miyerkules sa gabii, Abril 6.
Ang namatay mao si Ralph Tejares, 22, taga dan A.Lopez, Sityo Mahayahay 2, Barangay Calamba apan kasamtangang nanimuyo na sa Sityo Huya sa Barangay Tisa.
Apan ang iyaan nga si Nera Villejo, igsuon sa amahan ni Ralph, niingon nga nahibung na lang siya nga napatay ang iyang pag-umangkon.
Sa iyang nasayran, giingong gidagit ang iyang pag-umangkon uban sa iyang kapuyo ug laing duha pa niadtong Abril 5, Martes, nga gikan namista ug ningtambong sa disko sa tumoy nga bahin sa dan A.Lopez.
Dugang ni Villejo nga wala siyay kasayuran sa ilegal nga kalihukan sa iyang pag-umangkon.
Samtang, ang mga sakop sa Scene of Crime Operative (Soco) dunay narekober nga kabhang sa bala sa wala sa masuta nga armas ug mga binulto sa shabu nga moabot ngadto na sa kapin sa tunga sa kilo nga gibana-bana nga mobalor og P3.6 milyunes subay sa street drug price.
Matod ni Taneo sa interview sa Superbalita Cebu, taudtaod na nilang gimonitor si Tejares human nigawas ang iyang ngalan sa imbestigasyon sa pipila ka mga dinakpan sa gidiling drugas.
Sa plano na nga pag-validate sa mga operatiba kang Tejares, wala magdahum ang mga sakop niya nga makabantay kini kanila samtang ilang gisundan.
“Nasunog nami, Sir. Nakabantay siya mao nga mibunot ug gipabuthan mi mao na to nga nibawos akong mga sakop kaysa maunhan pa hinuon,” asoy ni Taneo.
Dugang niya nga upat kabuto ang gipaulan kanila busa wala sila mokompiyansa ug ilang gibawsan si Tejares.
Gihulagway ni Taneo nga regional high value Individual ang napatay tungod sa kadaghan sa shabu nga nakuha sa mga sakop sa Soco.
“Sa among inisyal nga validation tag usa ka kilo ang hagbong ani matag semana kay kato gani nga amo siyang gisundan, among gituohan nga nahagbong na ang tunga sa kilo ato,” dugang ni Taneo sa Superbalita Cebu.