Ex-body guard mireklamo batok sa mayor, bise

KANHI bodyguard ni Tabuelan Mayor Raul Gerona nipasaka og kasong graft batok niya ug sa iyang igsuon nga si Bise Mayor Rex Casiano Gerona sa anti-graft office tungod sa pagtukod og private wharf ug reclamation project sa Brgy. Tabunok sa amihanan-kasadpang lungsod sa Sugbo.

Apan si Mayor Raul Gerona, sa usa ka pakighinabi, nibaliwala sa reklamo batok kaniya ug sa iyang igsuon kay kini “politically motivated,” nga nag-ingon nga si Junel Genita, reklamante sa kaso, giingong gisuholan sa iyang kaatbang sa pulitika aron sa pagpahinay sa iyang reelection bid.

Sa reklamo nga gipadala niadtong Marso 24, 2022, gihangyo ni Genita ang Office of the Ombudsman sa Quezon City alang sa usa ka fact-finding inquiry sa municipal council sa Tabuelan bahin sa resolusyon nga ilang gipasar nga nag-endorso sa aplikasyon ni Gerona alang sa Special Agreement for Protected Areas (SAPA) niadtong 2014.

Gisang-at ni Gerona ang resolusyon sa ilang konseho sa munisipyo niadtong bise mayor pa siya sa maong lungsod.

Giangkon ni Genita nga niapil si Gerona sa pagtuki sa resolusyon nga gikinahanglan alang sa katukoran sa private wharf ug reclamation project.

Dugang pa niya nga ang igsuon sa mayor, kinsa mayor sa lungsod niadto, niaprobar usab sa resolusyon.

Gihulagway niya nga ang resolusyon nga gipasar sa konseho sa munisipyo sa Tabuelan “unlawful and irregular” tungod sa daghang mga hinungdan, lakip ang pagtugot ni Gerona nga makatukod sa usa ka pribadong pantalan ug port sa Barangay Tabunok bisan kon adunay daan nang pantalan sa lugar nga nahimutang labing menos 300 metros gikan niini.

Dugang pa ni Genita nga ang maong resolusyon wala gani giaprobahan sa Kagamhanan sa Probinsiya sa Sugbo, nga maoy gikinahanglan sa dili pa ipatuman.

Gikuwestiyon usab ni Genita kon nganong naka-secure si Gerona og propyedad diin natukod ang private wharf ug pantalan bisan kon ang maong lugar ubos sa Tañon Strait Protected Seascape ug wala kini masakop sa bisan unsang exemption alang sa paggamit sa pribadong mga tawo.

Matud pa ni Genita nga adunay illegal reclamation nga gihimo ni Raul Gerona sulod sa protected area.

Gilambigit usab ni Genita ang ubang mga publikong opisyal nga niapil sa pag-aprobar sa resolusyon, ang opisyal nga niisyu sa Environmental Compliance Certificate, ang opisyal nga niisyu og Permit to Construct Private Commercial Port, nga nipirma sa memorandum of agreement.

Apan si Gerona nitug-an sa SunStar Cebu nga nakuha niya ang legal nga mga dokumento nga gikinahanglan alang sa pagtukod sa pantalan, lakip na ang mga pagtugot gikan sa Department of Environment and Natural Resources ug sa Cebu Port Authority.

Dugang ni Gerona nga wala siya mogamit sa pundo sa publiko sa pagtukod sa pantalan ug sa susamang proseso sa aplikasyon sama sa ubang regular nga tawo.

“I even sought an opinion from the DILG (Department of the Interior and Local Government) and other agencies on how I can comply with the requirements. And so far, our constituents have benefited from the port,” matod niya.

Giangkon usab niya nga si Genita, kinsa unang nagsilbi nga iyang bodyguard, gigamit sa iyang kaatbang sa pulitika aron gub-on ang iyang kahigayonan nga makadaog sa piniliay karong tuiga.

Ang kaatbang ni Gerona sa pagka-mayor karong Mayo 9 mao si Fe Obenza Oca, samtang batok kang Rex pagka-bise mayor mao si Antonio Ong Obenza.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph