Pagkauso ining hiwi nga paggamit sa pulong Marites, naluoy ko sa akong mga higala ug kaila nga dunay susamang ngalan ini kay unfair kaayo ni sa ilang binunyagan’g angga . Ang uban giilisan na lang ilang pangalan o mibiya na sa social media kay nauwaw kay lagi gikaluhaan man ilang pangalan sa pulong nga tsismosa.
Marites, short cut sa Mari anong latest? Bato-bato sa langit ang naigo ayaw kasuko ha.
Kitang mga Pinoy nailhan sa tibuok kalibutan nga kusog mangoryuso, mag-apil-apil bisag way labot, hinawayon unya mopuno o kuha pa gayod sa estorya nga di mao.
Conscious kaayo ta sa ikasulti o ihusga sa uban nga kon buot huna-hunaon, wa man ni sila nagpakaon, nagbayad sa mga obligasyon o naghatag og kwarta aron ta mabuhi. In other words, wa ni silay labot sa atong kinabuhi, pang adlaw-adlaw nga tulumanon ug gastuhan, di ba?
Mahibulong intawon ang mga langyaw nga wa kasayod ini kay puno sa drama unya kuninitan pa ang di maong estorya.
Pananglitan, naay mokomentaryo nga puti o gwapa sa social media apan bati og nawong diay sa personal. Ayaw’g kasakit ini kay naa man silay maanindot nga telepono nga maka-magic sa hitsura sama ni Cinderella tungod sa filter nga makapahamis sa kutis ug pawala sa bugasbugas o tomtom.
Imbis manaway, pagpalit sab og parehas ini nga kahimanan para maka-level up.
Ang uban manaway kay daghan og utang. Pasagdi total wa ka man kaha ka pangayui og kantidad nga ibayad o tapal.
Feeling dato apan peke’ diay ang mga gamit. Pasagdi kay naningkamot man ni siya nga maka-kwarta para makuha o mapalit iyang mga tinguha, ma orihinal o peke’. Di kumo kabos, lago, gisi ug hugaw na lang sab kanunay ang ipangsuot .
TamSi (tambok nga sexi). Di na iyang problema kon abunda siya sa pagkaon. Ikaw nga nagtan-aw, kaon sab aron maparehas ka niya basta wa lang siya’y gipasakitan o wa mangayo nimo og ipalit para kaon.
Mas maayo pang kiputon ang baba unya ‘mind your own business’ para hapsay, tunhay ang pagpuyo unya way hilabtanay.