Lapu-Lapu misuspenso sa curfew ordinance

ARON makabangon ang negusyo sa dakbayan sa Lapu-Lapu, gisuspenso sa Konseho ang duha ka tuig nga curfew ordinance sa dakbayan.

Giaprobahan sa Sangguniang Panlungsod nga gipangulohan ni Bise Mayor Celedonio Sitoy ang hangyo ni Mayor Junard “Ahong” Chan nga temporaryong ihunong ang pagpatuman sa Ordinance No. 15-064-2020 pinaagi sa pagpasar og laing ordinansa niadtong Huwebes, Abril 7, 2022.

Ang Ordinansa No. 15-064-2020, nga gipatuman niadtong Marso 17, 2020, nagmando sa matag adlaw nga curfew gikan sa alas 10 sa gabii hangtod sa alas 5 sa buntag.

Ang dakbayan sa Lapu-Lapu gi-deescalate gikan sa Alert Level 2 status ngadto sa Alert Level 1 gikan sa Abril 1 ngadto sa 15, uban sa Mandaue City. Ang ilang kauban nga highly urbanized City of Cebu una nang gi-deescalate sa Alert Level 1 gikan sa Marso 16.

Dihang ubos pa sa Alert Level 2 ang dakbayan sa Lapu-Lapu niadtong Marso, nipadala og suwat si Chan sa Konseho nga suspensuhon ang curfew ordinance, matod sa Public Information Office (PIO).

Si Chan niingon sa iyang social media sa miaging buwan nga ang pagsuspenso sa implementasyon sa curfew maghatag og kahigayonan sa pipila ka mga negosyo nga mag-operate tibuok adlaw aron makaalagad sa mga kustomer, ilabina niadtong anaa sa night shift.

“Pinaagi niining atong gibuhat, atong gipanglantawan nga mas modaghan pa ang mga driver sa mga public vehicles nga mobiyahe matag gabii para dili na maproblema og kasakyan ang mga trabahante labi na sa mga call center agents sa MEPZ 1, MEPZ 2 ug sa Mactan Newtown o bisan sa kadtong mobyahe pa paingon sa Sugbo,” mabasa sa tipik sa post sa mayor.

Niadtong Nobiyembre, gihangyo usab ni Chan ang Sangguniang Panlungsod nga usbon ang oras sa curfew aron matabangan ang mga negusyo sa siyudad. Usa ka buwan ang milabay, sa gabii sa Disyembre 16, ang Bagyong Odette (Rai) nikuso-kuso sa dakbayan ug ubang bahin sa Sugbo.

Tungod sa kalamidad, giduso ni Chan ang pagsuspenso sa curfew ordinance aron makatabang sa pagbangon sa ekonomiya sa dakbayan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph