LUWAS na sa kaso nga sagubangon ang drayber sa SUV nga nibangga sa usa ka taxi dayon nidaro sa usa ka motorsiklo gikan sa Osmeña Boulevard paingon sa iyang gipuy-an sa Barangay Guadalupe, Siyudad sa Sugbo.
Ang motorsiklo nga gimaneho sa usa ka babaye nadagit ilawom sa Ford Everest hangtod sa condominium building diin siya nagpuyo mga kapin sa usa ka kilometro gikan sa nahitaboan sa aksidente.
Si Mel Carlo Villanueva, hingkod, taga dan R. Duterte, Barangay Guadalupe, gibuhian na sa Abellana Police Station human napriso og pipila ka oras human siya gidakop sa mga pulis tungod sa iyang pagbangga sa usa ka taxi ug motorsiklo.
Apan nakalusot man tuod siya sa posibleng kaso, ang hepe sa Abellana Police Station, Police Major Nolan Tagsip, moduso og report ngadto sa Land Transportation Office (LTO 7) aron ma-revoke ang driver’s license ni Villanueva.
Niadtong Huwebes sa alas 2 sa kaadlawon, Abril 7, unang naigo ni Villanueva ang taxi ni Jeffrey Rosales, 31, taga Upper San Jorge, Brgy. Guadalupe.
Wa nihunong si Villanueva human nakaigo sa taxi hinungdan nga siya gigukod ni Rosales.
Sa unahan, iyang nadasmagan ang motorsiklo nga gimaneho ni Marne Caparida, 24, taga Brgy. Lahug, Dakbayan sa Sugbo.
Si Caparida naghunong sa usa sa mga eskina sa Osmeña Boulevard kay stop ang signal.
Nalagpot si Caparida sa daplin sa karsada samtang si Villanueva padayong nipadagan nga nadagit ang motorsiklo.
Matud ni Tagsip sa Superbalita, si Caparida nakaangkon og mga pangos, apan luwas na ang kahimtang.
Ilang nasikop si Villanueva human nigawas sa iyang unit. Ang tulo nagtagbo ug nagkasinabot nga dili na mopasaka og kaso ang duha batok kang Villanueva.
“Adtong Huwebes nag tagbo ang drayber sa motor, taxi ug ang suspek. Nag amicable settlement sila then since nagka amicable settlement sila, the criminal aspect mawala na siya kay dili naman mo-file og complaint,” matod ni Tagsip.
Apan matod ni Tagsip nga wa pa hingpit nakalingkawas si Villanueva sa iyang responsibilidad.
“This can serve as warning also to others nga kadtong action nga gihimo niya, kadtong pag-drive niya nga ingon ato, we will make an investigation report addressed to LTO. Then we will recommend to LTO nga i-rebuke ang iyang license because it is unruly behavior ang iyang gihimo,” paghulagway ni Tagsip sa gibuhat ni Villanueva.