8 ka PUV drivers positibo sa drug test

WALO sa 335 ka mga bus ug taxi drivers ingon man konduktor nga gipaubos sa kinalit nga drug test positibo sa Biyernes sa buntag, Abril 8, 2022, sa Philippine Drug Enforcement Agency 7 (PDEA 7) sulod sa North Bus Terminal ug Cebu South Bus Terminal.

Sa gipadala nga resulta sa PDEA 7, ang mga positibo gilangkuban sa tulo ka mga bus driver, kinsa positibo nga nigamit og methamphetamine hydrochloride kun shabu, usa ka conductor ug upat ka taxi drivers.

Ang mga gipaubos sa kinalit nga drug test mao ang 149 ka bus drivers, 115 ka konductor, 65 ka taxi drivers ug unom ka utility vehicle drivers.

Matod ni PDEA 7 Director Levi Ortiz nga ang resulta sa drug test ilang iduso sa Land Transportation Office LTO 7 apil ang mga lisensya.

Sila na ang mosilot niini ug ipaubos usab sila sa counseling sa Cebu City Office for Substance Abuse Prevention (Cosap).

“Og kon ma positive sila, they need counseling and then we will advise them for reformation, and i turnover nato sila sa LTO ug sila na ang bahala sa ilaha,” matod ni Ortiz.

Si Aden Belza, law enforcement officer sa LTO 7, nagkanayon nga kadtong nagpositibo sa drug test huwaton una nila ang resulta sa confirmatory test apan kasamtangan sila nga isyuhan og temporary operators permit (TOP).

Kon makompirmar nga illegal nga drugas ang nakita sa drug test, i-revoke sa ahensya ang lisensya sa driver.

Mamahimong dili na kini makamaneho pa sa tibuok kinabuhi nga maoy silot niini.

“We hold it nya lagmit i-revoke na siya. Tan-awon sa nato unsay resulta sa confirmation,” matod ni Belza.

Gipasabot usab ni Ortiz nga ilang gituyo ang kinalit nga drug test nunot sa ilang pagpangandam sa nagsingabot nga Semana Santa ug pagpatuman sa ilang Oplan Harabas 2022.

Usa sa ilang gitan-aw ang kaluwasan sa mga pasahero ug aron masiguro nga di mabutang sa peligro ang ilang kinabuhi, ilang gisusi kon ang mga driver di ba tiggamitan sa illegal nga drugas.

Nabantayan hinuon nila nga kadto lang mga driver sa dagkong bus liner sama sa Ceres, Calvo ug Sanrays nga nagbiyahian sa habagatan ug amihanang lugar sa probinsya sa Sugbo ang nagpa drug test.

Ang mga driver sa mini buses nga gihulagway ni Carmen Quijano nga mga badlungon, wala modayon sa pagsulod sa terminal.

Matod ni Quijano, manager sa CSBT, nga ang mga driver sa mini buses ang ilang problema.

Gani sa miaging mga buwan, dunay driver ug konduktor ang nasakpan nga nag pot session.

Sa iyang nakita nga walay nitunga nga mga driver, siya nasagmuyo.

Awhag niya sa mga operator nga ipresentar nila ang ilang mga driver ug konduktor aron ipaubos sa drug test ilabi na karon nga modagsa ang daghang pasahero nga mamauli sa mga lungsod sa probinsya sa Sugbo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph