So, natubag na gyud ang mga pagduda human nga ang Los Angeles Lakers pormal nang nanamilit sa playoffs sa 2021-2022 season.
Wala nay maglalis kon makuha ba sa Lakers ang chemistry sa kinatibuk-ang puwersa aron, sa makausa pa, makadominar sa liga.
Gikan pa niadtong pagtapon ni Russel Westbrook ngadto sa Los Angeles aron hulmahon ang Big Three uban nila ni LeBron James ug Anthony Davis, daghan sa ilang mga dumadapig ang naghandom og positibong resulta.
Pero sukwahi sa ilang pangagpas, nahuman na lang ang regular season, way kausaban sa dagan. Ang permi natong maaninaw mao ra gyud ang ilang pagka-inconsistent sa duwa.
Nasentro sa pagbasol si Westbrook kinsa giingon nga wala maka adjust sa sistema sa Lakers ug nabantayan nga dili haom ang iyang dinuwaan kon ipares ni James.
Niini, wa isalikway sa Lakers ang pag-trade sa 2017 MVP awardee.
Usa sa mga team nga nagpakita og interest sa iyang serbisyo mao ang Charlotte Hornets.
Usa sa mga rason kon nganong interesado ang Hornets ni Westbrook tungod kay sa ilang kuwentada modako man ang space sa ilang salary cap kay labing minus tulo o upat man ka mga players ang ilang ibaylo niini.
Si Westbrook, sa sunod season, adunay player option nga $47 million ug posibling iya ning gamiton aron magpabilin siya sa Lakers.
Sa habig sa Hornets, si Gordon Hayward kinsa perming na-injured, dunay nahabilin nga duha ka season nga mokantidad og $120 million. Si Terry Rozier bag-o ra usab nga nakapirma og $97 million sa upat ka tuig unya naa pay $24.5 million sa final season ni Kelly Oubre Jr.
Mahimong kining gihinganlan sa unahan maoy ikatugbang ni Westbrook. Gibana-bana nga maka saved sila og $38 million kon mahinayon.
Dili ikabalaka kon di mohaom si Westbrook sa estelo sa star player sa Hornets nga si LaMelo Ball kay usa ra man sab ka tuig ang nahabilin nga kontrata niini nga ilang sagubangon.
Laing senaryo, interesado si Westbrook nga magpabilin sa Lakers ug gani mihangyo kini og laing tsansa.
Pero aron pagkombinsi sa front office sa Lakers mahimong mopaus-os siya sa presyo ug lugwayan og pila ka season ang kontrata.
Apan ang labing siguro nga mahitabo sa Lakers mao nga ilisan gyud ang ilang coach nga si Frank Vogel.
Interesado ra ba ang Lakers ni coach Doc Rivers sa Philadelphia Sixers. (jun.migallen22@gmail.com)