Sa sige na nakong adto sa Camotes, daghan na ko og naagiang mga karsada nga wa nako madiskobrehi kaniadto. Ang nakaanindot ani nga isla kay dunay mga bukid nga kutas pud lagi tangason. Alang nako heaven kaayo ni nga isla.
Kon ganahan kang maligo sa dagat, naa ra sa daplin. Suwayi ang ilang nautical highway gikan sa Poro padung sa Tudela. Ang karsada molagbas ra daplin sa baybayon. Mahimo ka rang mohunong ug maligo kay libre ra gyud.
Mahimo ra sab nga mag overnight ka sa Tudela, dapit sa lungsod proper kay naay hayag ug kusog ang internet connection. Safe pud kay duol ra kaayo ang police station.
Kon sa San Francisco ka, naa ang Brgy. Himinsulan nga dunay baybayon nga sama ka puti sa Boracay. Ang iyang karsada same ra padung sa Mangodlong apan di ka pa makaabot, moliko ka sa usa ka eskina nga naa ang ngan sa Heminsulan.
Kon magpa bukid ka, naa say daghang kapilian. Kay ang Camotes napuno man sa road network, naay wa pa ma concrete, daan ug libaungon na ug kanang hamis pa kaayo.
Nindot kaayo i-explore ang isla but sagad sa akong nabantayan, naa lang ang bikers nagsikad sa mga main road. Wa pa ko makakita og bikers nga nisuot sa mga hilit nga dapit sa isla. Kon sa main road ka, mas maayo og road bike ang imong dad-on.
Sa ako nang gihisgutan sa akong unang columns, mas challenging ang Poro nga ari ka moagi sa Brgy. Tiguis padung sa Tudela kay daghan ang climbs. Naay taas pud nga portion.
Kon gusto ka og hanayhay apan sige ang tungas, sama sa Pulangbato padung sa Guba, suwayi ang Brgy. Altavista sa Poro og duaw kay lahi sa ubang mga dapit, tag-as ug dagko ang mga kahoy. Landong, apan makalingaw sab ang pagtungas.
EXPLORE
Ayaw paggahin og usa lang ka adlaw sa Camotes aron ka malingaw kay daghan pa kaayong angay nga idiskobre sa kaanindot sa isla. Wa gani ko magdahom nga naa sab ni diay sapa. Sa akong pagtuo, maorag duha ni ka river system although di pa ko segurado.
Luwas sab ning dapita kay sa akong nabantayan, ang mga helmet sa motorsiklo ipangbilin ra man sa mga dapit nga tapukanan sa mga tawo. Way manghilabot tingali kay bisan nindot nga helmets naa ra sa manubela gibitay.
Sa una nagtuo ko nga Lake Danao ra ang nindot tambayan kon mag bike packing. But samtang nagsuotsuot ug nag explore ko sa Camotes, diha ko nakakita nga daghan pa diay kaayo ang mga dapit nga mahimo kaayong matambayan ug mapahuwayan samtang magsud-ong ka sa kadagatan.
Mao na kon akoy magbiseklita sa isla, modunggo ko og Biyernes sa gabii dayon mosikad og sugod sa Sabado. Di lang sa main roads, suoton ang mga secondary road network.
Pagbawon lang gyud hinuon og tubig tungod kay nihit ang mga tindahan sa suoton nga mga dapit.
Kon bird photography enthusiast ka, naa say daghang maanindot nga mga langgam sa Camotes.
Basta alang nako, maanindot kaayo i-explore ang isla ug tambayan og taas nga oras. Makawala sa stress.