Napugwat akong atensiyon dihang namahayag si Mayor Raul Gerona sa Tabuelan nga naa siyay opinion sa Department of the Interior and Local Government (DILG) nga legal ang iyang gipangbuhat aron matukod ang iyahang pribadong pantalan diha sa iyang lungsod.
Taudtaod na ko nga wala makasabot nganong dunay duha ka pantalan sa lungsod sa Tabuelan. Dunay pampubliko nga pantalan ug duna say pribado nga gipanag-iya sa mayor. Mahimo diay na? Di ba alkansi ang kagamhanan sa imong niana nga sistema?
Natubag ang akong pangutana dihang nakabasa ko niining taho nga gikiha ang managsuong sila si Mayor Gerona ug Bise Mayor Rex Casiano Gerona og graft and corruption tungod sa maong pantalan.
Lig-on ang basehanan sa maong kaso kay daw nagdula-dula lang ang mayor, nga maoy bise mayor niadtong tungora, ug ang iyang igsuon.
Bisan pa man, kinahanglang balanse ang atong pag-evaluate sa maong kaso. Mao nga gusto sab ko makabasa sa habig sa mga Gerona.
Gani, interesado kaayo ko makabasa sa giingon ni Mayor Gerona nga opinion sa DILG. Labing maayo kon ipakita ni Mayor Gerona ang maong dokumento lakip na sa mga approval sa Department of Environment and Natural Resources (DENR) ug ang Cebu Port Authoity (CPA).
Grabi na man sab kon mangatik lang sa mga sakop sa media si Mayor Gerona. Isip pruweba, angay lang niyang ipakita kini.
Gusto ko makahibawo kon giunsa nga nahimong legal ang ilang gibuhat.
Naa sa Manila
Akong nasabtan ni Mayor Gerona, sa iyang pamahayag sa Sun.Star, nga pakulo lang kini sa iyang kaatbang sa politika ug di angay kabalak-an.
Apan ang pangutana. Nganong kalit nga naabot man karon si Bise Mayor Rex sa Manila karong campaign period? Ingon diay ana ka seryuso, mga sir?
Lain sab, angay nang magbantay ang mga opisyal nga pangduolon. Kay kon tuyo ang pag-damage control (I hope dili), daghan sab ang mangaangin.
CCMC
Usa ka kontrator sa Cebu City Medical Center (CCMC) ang nagtinguha karon nga madeklarar nga pakyas ang nahitabong bidding sa phase 4 sa maong hospital.
Matod pa, tungod kini sa kakulang sa “transparency” ug “competiveness.”
Ang C.E. Padilla nipadayag niini sa usa ka verified protest pinirmahan ni Hector R. Loyola, project coordinator, ug gisumiter kang Mayor Mike Rama sa miaging Marso 18, 2022.
“Declaring a failure of bidding would be the only way for you to correct the impression that a specific bidder had been unduly favored,” matod ni Loyola sa iyang position paper.
Kining maong kontrobersya, makalangay na sab paghuman sa CCMC ug molapas na sab sa termino ni Mayor Rama.
LENI UG ISKO
Lingaw sa miaging Biyernes ug kagahapon sa Sugbo kay nia dinhi ang asawa ug anak ni Manila Mayor Isko Moreno ug ang kinamaguwangang anak ni Vice President Leni Robredo nga si Aika.
Si Isko kinahanglan magpakitang-gilas pinaagi sa dakong mobilisasyon dinhi sa Sugbo. Naa siyay dakong concert didto sa sa Hoopsdome sa Lapu-Lapu City. Mag-rally concert sab daw didto sa Syudad sa Toledo kagabii.
Si Aika, sa iyang bahin, daghan og mga ginagmay nga events dinhi sa Metro Cebu sa Biyernes. Dayon kagahapon, naay Fun Run ug kining Pink Fair sa Phinma SWU.
Ug atong nabantayan nga uban sa mga Liloan Youth for Leni mao ang usa ka food station ni Leni-Ace-Junjun kon ang kalihokan sa mga pro-Leni nga supporters nilang kanhi tourism secretary Ace Durano ug Leni leader Vice Governor Junjun Davide. (DM nako @anol_cebu)