Giklaro ni Cebu City Mayor Michael “Mike” Rama nga wala pay endorsement nga gihatag ang relihiyosong grupo nga Iglesia ni Cristo (INC).

Sa interbyu niadtong Biyernes, Abril 8, 2022, si Rama niingon nga ningbisita lang sila sa INC ug walay political endorsement ang gihatag sa grupo ngadto sa ilang partido.

Hinuon matod ni Rama nga malaumon siya nga suportahan sa simbahan ang iyang tinguha nga magpapili pag-usab isip mayor sa umaabot nga piniliay.

Sa Facebook post sa usa ka page nga adunay ngalan nga “Mike Rama” niadtong Huwebes, Abr.7, ang mayor nakit-an gawas sa simbahan sa INC kauban ang pipila ka mga kandidato sa Barug-PDP Laban party ni Rama.

Sila si Bise Mayor Donaldo “Dondon” Hontiveros, Konsehal Joel Garganera, ug kandidato pagka konsehal Harry Eran ug Peter Mancao nagpahulagway.

Nailhan ang INC sa bloc voting sa mga miyembro niini.

Ang original caption sa post nagkanayon, “Mga kaigsuonan sa Iglesia Ni Cristo akong dakong pasalamat sa inyong suporta sa atong Partido Barug PDP-Laban ug Marino Partylist.”

Hinuon, kini gi-edit dayon nga adunay usa ka bag-ong kapsyon nga nagtangtang sa mga pulong nga naglambigit sa suporta gikan sa nahisgutang simbahan.

“Our sincere apologies for the mis-impression created earlier by this post, a misunderstanding by an enthusiastic supporter,” mabasa sa portion sa edited caption.

Matod ni Rama nga importante kanunay nga pangitaon ang suporta sa tanang relihiyusong sektor ug mga organisasyon atol sa eleksiyon.

Sa text message nga gipadala sa SunStar Cebu niadtong Abr.8, si Garganera nagkanayon nga “all candidates seek support and as the election gets nearer, that is they (INC) decide on who they will endorse.”