Gipasalamatan ug gidayeg ni Talisay City Mayor Gerald Anthony “Samsam” Gullas ang mga frontliner human niya nasayran nga ang dakbayan maoy labing unang dapit sa Lalawigan sa Sugbo nga gi-deescalate ang quarantine classification, gikan sa Alert Level 2 ngadto sa Alert Level 1.
Ang dakbayan sa Talisay usa sa mga dapit sa Pilipinas nga gipaubos sa Inter-Agency Task Force (IATF) ngadto sa Alert Level 1 gikan sa Abril 9-15.
Matod ni Gullas nga nahitabo kini tungod sa paningkamot sa mga frontliner sa dakbayan inubanan sa kooperasyon sa katawhan nga nagpabakuna.
“When the Covid-19 pandemic began, our frontliners-medical and non-medical--fought for us to keep us safe. And dako gyud nakong garbo nga ang ilang pagsakripisyo, na recognize gyud sa national government,” matod ni Gullas.
Matod sa mayor nga 80 porsyento sa eligible nga populasyon ug 80% sa senior citizens nabakunahan.
Lapas na kaayo kini nga gidaghanon kay 68 porsyento lang ang gitakda sa nasudnong kagamhanan aron ang usa ka dapit mapaubos sa Alert Level 1.
Gihulagway ni Gullas ang mga frontliner nga mga modernong bayani taliwa sa pagsaulog sa nasod sa Araw ng Kagitingan kagahapon, Abril 9.
“Today I believe we must give recognition to the heroes of the past. But we also have to give recognition of the heroes of the present. Today we should also commemorate the men and women who continue to fight to keep us safe, whether from internal and external threats,” matod sa mayor.
Matod niya nga nagbunga gyud ang paninguha sa mga frontliner, labina sa mga vaccinator kay nakab-ot niini ang kalampusan sa pagpamakuna.
Iya usab nga gipasalamatan ang mga Talisaynon.
“I would also like to thank all Talisaynons for cooperating with us in our fight against Covid-19 by voluntarily submitting themselves to vaccination. Dili ni mahimong posible ang atong kagawasan kon wala mo nikugi nga mo-participate sa atong vaccination program,” dugang sa mayor.
Ang dakbayan sa Talisay maoy ikaupat nga dapit sa Sugbo nga gipailawom sa Alert Level 1.
Ang labing una mao ang dakbayan sa Sugbo nga nagsugod niadtong Marso 16. Nisunod usab ang mga dakbayan sa Lapu-Lapu ug Mandaue sugod sa Abril 1-15 human natakdo ang ilang vaccination records sa nasudnong listahan sa gidaghanon sa mga nabakunahan.