Lalaki gipatay, gibitay

Lalaki nga gituohang gipatay ug gibitay napalgang nagbitay sa taytayan sa Purok 6 Kamahayan Bridge, Barangay Rosario, lungsod sa Cortes, Bohol pasado alas 6:00 sa buntag sa Sabado, Abril 9,2022.

Si Police Staff Sergeant Gregorio Bayocot Jr. sa Cortes Police Station nibutyag nga nadawat nila ang impormasyon kalabot sa usa ka tawo nga nagbitay sa taytayan gamit ang usa ka pisi.

“Pagkadawat namo, Sir, sa tawag gikan sa usa ka concerned citizen, dali dayon namo nga giadtoan ang area ug naabtan namo nga nagbitay na ning biktima,”matod ni Bayocot.

Giila ni Bayocot ang biktima nga si Janlery Paredes Cartagenas, 30, usa ka tourist van driver, taga Mansasa District, Tagbilaran City.

Usa ka Jerry Linao ang unang nakakita kang Cartagenas nga nagbitay.

Matud ni Bayocot nga gibana-bana sa 10.9 metros ang gitas-on sa pisi nga maoy gigamit sa pagbitay sa mga killer ni Cartagenas.

Matud ni Bayocot nga way nakakita dihang gihimo ang krimen, apan si Alejandro Apig, nagpuyo sa duol, nakadungog og mga paghot sa iro ug busina sa sakyanan pasado alas 2 sa kaadlawon.

Mga 30 minutos ang nakalabay, usa ka puti nga van nga wa magsiga ang suga niagi sa tungod sa ilang balay.

Ila pang sutaon ang background ni Cartagenas nga posibleng mahimong giya sa imbestigasyon sa kapulisan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph