Managsuon naangol, lakip na ang drayber sa dumptruck nga nalimbuwad sa Sitio Riverside, Barangay Polog, lungsod sa Consolacion, alas 8:00 sa buntag sa Sabado, Abril 9.

Nalandig sa tambalanan mao si John Bryle Gasal, 20, ug iyang maguwang nga si Joseph, 22.

Naangol ang drayber sa dumptruck nga si Franklin Salonga, 34, nagpuyo sa nahisgutang lugar.

Nakaambak iyang truck boy nga si Audie Sumalinog.

Si Police Staff Sgt. Roel Aquino, imbestigador sa Consolacion Police Station nga nahinabi sa Superbalita Cebu, nagkanayon nga dunay karga ang dumptruck samtang nagmaniobra ang drayber sa dulhugon nga dan nga dangog tungod sa uwan ug kalit nga wa mogana ang break hinungdan wa na makontrolar sa drayber ang sakyanan.

Ang duha ka panimalay nga naigo sa dumptruck, gipanag-iya ni Danny Gasal ug Urgelio Ramirez nga ginama sa mixed materials.

Ang mga angol gidala sa North General Hospital tungod sa minor injuries.

Hinuon, ang mga pamilya nga naapektuhan nagkasabot sa Leyang Aggregate Corp. nga abagahon ang gasto sa Hospital ingon ang kadaut sa mga panimalay.