Dili mominos 20 ka children in conflict with the law (CICL) ang ning-eskapo sa Operation Second Chance Rehabilitation Center (OSCRC) sa Barangay Kalunasan, dakbayan sa Sugbo niadtong Sabado sa gabii, Abril 9, 2022.
Atol sa pagkutlo ning taho, si Police Major Jonathan Dela Cerna, hepe sa Guadalupe Police Station, nibutyag nga pito ka CICL ang ningtahan.
Si Dela Cerna nagkanayon nga padayon ang ilang operasyon sa pagsikop sa 13 ka CICL ug gipaalerto ang tanang estasyonan sa kapulisan sa dakbayan ug lalawigan.
Ang 20 ka CICL nga nasulod sa OSCRC nag-atubang og kaso sa gidiling drugas, kawat ug pagpanulis.
Ang direktor sa OSCRC nga si Ambrusio Ibones, nibutyag nga nahitabo ang pag-eskapo sa mga menor de edad dihang laing usa ka menor de edad ang naglisod og ginhawa nga dalhon unta sa tambalanan.
Sa dihang pagsakay sa sakyanan sa masakiton, kalit nihamag ang ubang CICL ug wala na makontrolar sa duha ka mga guwardiya.
“Dunay bata nga dad-unon og hospital kay naglisod og ginhawa. Paggawas, gidam-agan ang gwardya ug ang house parent, gidam-agan atong daghan kaayo. Wa makontrolar,” matod ni Ibones.
Subay sa imbestigasyon sa kapulisan, matod ni Dela Cerna, nadawat nila ang tawag kalabot na sa pag-eskapo sa mga menor sa alas 9:00 sa gabii sa Sabado dihang mitawag ang representante sa OSCRC kalabot sa maong hitabo.
“Kining minors nagplano na gyud ni sila. Ilang gilusob dayon diretso ang gate, nagdala og binugha. Wala nakapugong ang guard. Murag giplano gyud nga mang-eskapo sila,” dugang ni Dela Cerna.
Nasayran nga alas 8:00 sa gabii sa Sabado, nahitabo ang pag-eskapo sa mga menor.
Kon hisgutan ang seguridad sa palibot human sa pag-eskapo, giklaro ni Ibones nga wala kiniy angay kabalak-an.
“Wa nay problema mga bataa. Mamauli rana sila,” dugang ni Ibones.
Apan nanawagan siya sa mga ginikanan sa mga menor de edad nga pabiling naa pa sa gawas nga kon mouli sa ilang panimalay ang ilang mga anak, ipa-surrender kini o tawagan sila aron kini kuhaon.
Nasayran nga karong tuiga, mao kini ang labing una nga hitabo. Apan niadtong 2019, duha ka insidente sa pag-eskapo ang nahitabo.