Nagbaha ang miingon og “Sana All” sa social media human nag-trending ang video ni basketball player Ricci Rivero ug aktres Andrea Brillantes.

Ang shooting guard sa University of the Philippines (UP) Fighting Maroons migamit sa iyang pagkahingigo di lang sulod sa court dihang iyang gipangutana si Brillantes gamit ang mikropono kon pwede ba kini niya mahimong uyab.

Ang 19-anyos nga dalaga mitan-aw sa duwa sa UP batok Far Eastern University (FEU) Tamaraws sa University Athletic Association of the Philippines (UAAP) Season 84 men’s basketball tournament niadtong Sabado.

Human sa duwa, miingon si Rivero: I just want to ask Blythe, can you be my girlfriend?

Adunay duha ka tawo nga mibitbit og t-shirt nga adunay printa nga Yes ug ang usa kay No, nga miduol kang Brillantes. Gipili ni Brillantes ang Yes shirt.

Nag-trending dayon ang maong video ug mikuha kini’g managlahi nga reaksiyon gikan sa netizens. Samtang si Brillantes, mi-post usab sa iyang Facebook account kabahin sa nahitabo.

Matod pa niya nga unang higayon pa niya nga milantaw og live UAAP basketball game, wa niya damha nga dinhi pa siya makauyab.

Ang maong post ni Brillantes aduna nay 1.3 million reactions, 255,000 comments ug 205,000 shares kagahapon. Ang Facebook page ni Brillantes anaay 17 million followers.

Doble ang selebrasyon sa 23-anyos nga si Rivero kay midaog man pud sila batok sa Tamaraws sa iskor nga 83-76. Gitapos ni Rivero ang maong duwa nga adunay 10 puntos.

“Got two wins today #UPFight,” suwat ni Rivero sa iyang opisyal nga Twitter page.

Ang Fighting Maroons anaa sa ikaduhang pwesto sa team standings bitbit ang rekord nga unom ka daog batok usa ka pilde.