Dominasyon ang gipakita sa 7-footer Joel Embiid sa Philadelphia 76ers atubangan sa ilang home court fans kagahapon.
Mipakatap og 41 puntos ug 20 rebounds si Embiid aron pangulohan ang Philly ngadto sa 133-120 nga kadaogan batok Indiana Pacers sa National Basketball Association (NBA) regular season game sa Philadelphia.
Midugang og 22 puntos ug 14 assists si James Harden. Si Tobias Harris ug Tyrese Maxey mitunol og 18 puntos matag usa, samtang miamot og 15 puntos si Danny Green.
Human sa maong duwa, hayan nabulsa na ni Embiid ang iyang pinakauna nga scoring title sa NBA. Si Embiid adunay 30.6 average sa regular season, nagsunod mao ang pambato sa Milwaukee Bucks si Giannis Antetokounmpo (29.8).
Apan statistically, lisod na apson si Embiid.
Ang 76ers adunay usa nalang ka duwa nga nahibilin sa regular season, samtang usa nalang pud sa Bucks.
Matod pa sa DraftKings Nation, kon dili moduwa si Embiid sa ilang final game kinahanglan si Antetokounmpo og 78 puntos aron makalabaw sa average points per game. Kon moduwa gani si Embiid unya butlog sa scoring, lisod gihapon ang tahas ni Antetokounmpo kay dapat siya mopabuhagay og 47 puntos aron mailog ang labaw.
Giaswat ni Embiid sa iyang mga bukton ang Philadelphia karon nga season ngadto sa ikatulong pwesto sa NBA Eastern Conference bitbit ang 50-31 nga baraha.
“I’ve always said that every single night, I want to dominate,” batbat sa 28-anyos nga si Embiid. “If you are dominating, things can show up in a lot of different ways — whether it is offensively or defensively. Sometimes, the numbers don’t show it. But it’s good, I guess.”
Ang third-pick sa 2014 NBA Draft adunay average nga 30.6 points, 11.7 rebounds ug 4.2 assists sa iyang ikalima nga season sa NBA.