PIPILA na lang ka semana piliay na sa Mayo 9, 2022. Bisan pa niining pandemya sa Covid-19 nga mikatay na sa nagkalainlain nga variant gikan sa Delta, Omicron, hangtud sa giingon nga XE, di na kapugngan ang piliay tungod kay nasugdan na ug nagpadayon na nga kampanya sa mga magpapili sugod sa presidente, bise presidente, senador, kongresista ug sa local nga mga opisyales.
Sa wa pa magsugod ang kampanya, ang Commission on Elections (Comelec) nagpakanaog og Resolution No. 10732, nga naglatid sa pagpangampanya tungod aning nagpadayon pa nga pandemya sa Covid-19 sama sa physical distancing, sul-ob og face mask, panglamano, selfie, ug ang kandidato mo sul-ob og face shield.
Sa usa ka interbyo, giangkon ni Comelec Cebu Provincial Supervisor Jerome Brillantes nga daghan mga kandidato ang wala makatoman sa minimum health protocols sama sa social distancing, panglamano ug selfie. Apan matud ni Brillantes, gilibkas na ni Presidente Rodrigo Duterte ang pagsul-ob sa face shield sa mga dapit nga naa na sa Alert Level 1-3.
Ang dakong pangutana, duna na bay kandidato/kandidata nga gipasakaan og sumbong tungod sa pagsupak sa Comelec Resolution No. 10732? Wala pa koy nahibaw-an nga usa ka kandidato o kandidata nga napasakaan og sumbong sa wala pagtuman sa lagda sa Comelec. Kini, tungod kay ang Comelec naghulat man lang kon dunay mosumbong ngadto sa ilang opisina.
Hinuon, di ta makahibawo nga sa di pa matapos ang kampanya gamiton ni sa mga kandidato/kandidata nga walay purohan nga modaug batok sa mga kandidato nga nag-una sa survey aron mababagan ang ilang pagdaug unya. Posible, di ba?
Kitang tanan nakahibawo, labi na sa akong ka-edad, nga sa atong klase nga pamulitika, ang mga kandidato dili makalikay sa lamano, gakos, ug sa karon nga uso selfie, tungod kay ang kandidato o kandidata nga dili molamano ug magpa-selfie sa mga botante makontrahan ug dayon ingnon nga garboso o garbosa.
Pipila lang sa mga kandidato o kandidata ang atong makita nga kanunay magsul-ob og face mask sa ilang pangampanya. Dunay mga kandidato/kandidata, nga sa ilang paminaw mas nindot o sayon sila nga sabton kon mag-estorya nga walay face mask. Kon tinud-on sa Comelec ang pagpatuman sa pagsul-ob sa face mask, morag ang tanan kandidato/kandidata, nasyonal ug lokal, di makapasar.
Dr. Mary Jean Loreche, tigpamaba sa DOH-7, nagpahinumdum sa mga botante sa pagpili sa ilang botohan nga mga kandidato/kandidato. Matud ni Loreche, angayan nga botohan ra ang mga nagpapili nga nakatuman sa lagda sa minimum public health protocols tungod kay nia pa man ang Covid-19 nato. Gibutyag ni ni Loreche sa SunStar Cebu tungod kay nakahibawo siya nga daghan nga lokal ug nasyonal nga kandidato/kandidata ang wa makatuman sa public health protocols.
Gani, atong nakita sa mga nangagi nga campaign rally nga tungod sa kadaghan sa mga tawo o dumadapig sa mga nagpapili sa Mayo 9, 2022 nga piliay, wala na matuman ang physical distancing ug daghan ang wala na mosul-ob sa ilang face mask. Ang mas delikado kon mas daghan ang miduyog sa mga campaign rally nga wala pa mabakunahi hangtud karon.