Sa hinugtanay og depensa nga kombati, ningpatigbabaw ang Meralco Bolts batok sa defending champions Brgy. Ginebra Gin Kings, 83-74, sa Game 3 niadtong Dominggo, Abril 10, 2022 nga naghatag kanila og 2-1 nga bintaha sa championship series sa Philippine Basketball Association (PBA) Governor’s Cup sa Mall of Asia Arena sa Pasay City.
Ang Bolts, nga naggukod og 13 puntos sa sayong bahin, nipahamtang og mas pilit nga depensa sa 2nd half aron paghan-ay og agianan paingon sa siyam ka mga puntos nga kadaugan.
“It’s all effort, all heart. We’re down early but we stayed together, played defense and battled hard, that’s what we did,” matod sa import sa Bolts nga si Tony Bishop.
“We showed what we can do together.”
Gipangulohan ni Bishop ang kadaugan pinaagi sa iyang 30 puntos ug 16 assists, nitampo og 20 puntos si Chris Newsome samtang nitunol og 10 puntos si Allein Maliksi.
Sa grabe ka pilit sa depensa sa Bolts, ang Gin Kings wala na nakadugang og puntos sa nahabiling 5:21 ka mga minutos nga tatawng nakapasagmuyo sa nagtapok nga mga dumadapig sa crowd-favorite nga puwersa.
Ang import sa Gin Kings nga si Justine Brownlee, kinsa nag-average og 30 puntos sa nag-unang duha ka mga duwa sa best-of-seven series, nalimitahan lang og 19 puntos ning higayuna.
Ang Fil-German nga si Christian Standhardinger nidugang og 17 puntos alang sa Gin Kings samtang ning-amot og 11 puntos matag usa sila si LA Tenorio ug Scottie Thompson.
Ang duwa nakahakot og 16,104 ka mga tumatan-aw, labing daghan sukad ningkuyakap ang pandemya.