Nanghinaot si Francis Gerard “Jigger” Selma Cañedo, kandidato sa pagkamayor sa lungsod sa Minglanilla, nga ang buhatan sa Commission on Election (Comelec) moresolbar na sa ilang apelasyon sa iyang gipasaka nga disqualification case.

Kini ang panawagan ni Cañedo ngadto sa Comelec, pinaagi sa pagduso sa disqualification case batok sa usa ka Francisco “Jiger” Cabatuan Cañedo, usa ka mag-uuma nga nagpapili sab sa pagka mayor sa Minglanilla.

Gipasabot ni Jigger, tungod kay pareho sila og apilyedo, makaapekto kini sa iyang mga boto hinungdan nga niduso siya sa maong reklamo niadtong Oktubre 13, 2021.

Sumala pa niini nga ang Comelec 2nd Division nipagawas na sa ilang desisyon sa pagdeklara sa laing Cañedo nga nuisance candidate niadtong Desyembre 16, 2021.

Ang maong desisyon gihangop sa kampo ni Selma Cañedo nga makapawagtang sa kalibog sa mga botante.

Gireklamo ni Cañedo pinaagi sa motion for reconsideration niadtong Enero 4 ning tuiga.

Wala pa gyud matagad ug naabtan na sa duha ka buwan, wala pa nakapakanaog og resolusyon ang Comelec hangtud nga naprinta na ang ngalan sa usa ka Cañedo sa balota.

“It is for this very purpose, that I am humbly asking the Comelec en Banc to swiftly and earnestly reslove the pending Motion for Reconsideration, if only to afford me recourse to remedial remedies, should there be still available, considering that we only have three weeks more to go before election day,” uwat ni Selma Cañedo ngadto sa Cebu Comelec province sa iyang pag-apelar.

Sumala pa niini nga hangtud nga di mapagawas ang resolution sa Comelec, makaapekto kaayo sa iyang kandidatura ug makapalibog sab sa katawhan.

Nasuta nga ang usa ka Cañedo wala na igkita human nakaduso sa Certificate of Candidacy (COC) sa buhatan sa Comelec.

Wala sab kini motunga sa gipahigayon nga peace covenant signing.