Mga bus terminal ug pantalan sa dakbayan sa Sugbo pabutangan og police personnel sugod ugma, Abril 13, 2022, nunot sa pagtuo nga modagsa ang mga manakayay nga mamauli sa ilang tagsa-tagsa ka probinsya.
Gipanglantawan sa Cebu City Police Office nga modagsa ang daghang pasahero nga mamauli sa probinsya aron didto mohandom sa Semana Santa.
Matod ni Police Lieutenant Colonel Janette Rafter, hepe sa operations branch sa CCPO, nga ang matag police station adunay tagsa-tagsa ka security plan aron ma-maximize ang mga personnel nga ipang-deploy sa mga dapit nga angay nga patutukan.
Nakig-alayon na usab sila sa mga barangay tanod aron matabangan sila sa paghatag sa seguridad sa mga lugar nga modugok ang mga tawo.
Gibutyag usab ni Rafter nga mag-deploy sila og mga PNP personnel sa gawas sa Cebu South Bus Terminal (CSBT) uban sa mga traffic enforcer sa Cebu City Transportation Office (CCTO) aron idili sa mga bus de pasaheroan ang pag pasakay og pasahero sa gawas ilabi na sa dalan Natalio Bacalso.
Sama sa naandan naa mag-atang sa gawas ang mga pasahero ug mokapyot sa mga bus nga mobiyahe paingon sa habagatang bahin sa probinsya sa Sugbo.
Kon unsay balaod nga gipatuman sa CSBT mao usab kini ang ilang ipatuman sa gawas.
Una nang nibutyag si Carmen Quijano, manager sa CSBT, nga ipatuman nila ang 75 porsiyento nga capacity sa mga bus aron masunod gihapon ang mga health standard sa mga pasahero.
“Sa sulod sa terminal, controlled ang pasahero, but ang mga tawo mag huwat ari sa gawas, nakabantay mo anang inig liko diha sa may atbang sa LTO7? Puno nag tawo diha usually, mohinay gyud ang mga sakyanan diha kay mangumbitay ang mga tawo so we will deploy CCTO and our police,” matod ni Rafter.
Giawhag ni Rafter ang bus drivers nga kon unsa lang ang gipatuman nga balaod sa terminal ilabi na sa gidaghanon sa mga pasahero, tumanon lang kini sanglit alang lang man usab kini sa ilang kaayohan.
Samtang 33 usab ka mga dagkong Simbahang Katoliko ang nalista na sa CCPO nga ilang pabutangan og mga personnel nga adunay kalihukan sa Semana Santa.
Ang matag simbahan adunay gitahasan nga mobantay nga kapulisan aron masiguro nga luwas ang mga mohimo og Bisita Iglesia ug ubang kalihokan sa mga debotong Katoliko.