Awto nabulintang ug nahulog sa kanal, apan ang driver nga sundawo luwas atol sa disgrasiya sa alas 10:30 sa gabii sa Dominggo sa may diversion road sa Brgy. Poblacion 3, Dakbayan sa Carcar.

Ang biktima giilang si Anthony Cañete, Jr., 29, ulitawo, sakop sa Philippine Army, taga Lower Pakigne, lungsod sa Minglanilla.

Si Police Lt. Col. Ardioleto Cabagnot, hepe sa Carcar Police Station nga nahinabi sa Superbalita Cebu, nagkanayon nga si Cañete naapiki sa iyang pag-atras sa iyang Red MG5 Sedan 2022 (LAJ 2332).

Matud ni Cabagnot nga si Cañete gikan sa Mantalongon, Barili padulong mopauli sa lungsod sa Minglanilla.

Samtang nagpadagan, naapiki siya sa karsada kay dunay naka-parking nga ubang mga sakyanan.

Iyang na-miscalculate hinungdan nga nalahos siya sa open canal dayon nahulog ug nahayang ang awto.

Ang awto nakuha gikan sa canal Lunes na sa udto, Abril 11, 2022.