Bana nipusil patay sa 20 anyos nga lalaking gikadulog sa iyang asawa sulod sa ilang balay ala 1:00 sa kaadlawon sa Lunes, Abril 11, 2020 sa Purok Langoyon, Brgy. Mangga, Tuburan.

Patay nang niabot sa ospital si Danilo Villarin, alyas Matoy, 20, ulitawo, residente sa nahisgutang lugar.

Wa na igkita ang suspek nga si Ferdie (di tinuod nga ngan), kapin sa 50 anyos.

Si Police Senior Master Sgt. Roberto Rondina, imbestigador sa Tuburan Police Station nga nahinabi sa Superbalita Cebu, nagkanayon nga ang katabang nga si Ma. Daisy Sacendon Maano, nibutyag sa kapulisan nga natulog si Villarin uban sa iyang amo nga si Joy, 50.

Ang katabang nibutyag nga nakamata siya human sa sipang buto sa armas kay ang iyang lawak tupad sa kwarto sa magtiayon.

Human sa buto, nadungog niya nga sila si Joy ug Ferdie naglalis.

Nigawas siya aron sa pagsusi ug iyang nakit-an si Ferdie nga nagkupot sa armas samtang si Villarin nagligdas, nagkadugo.

Duna kiniy mga samad sa dughan ug walang bukton.

Si Joy nitug-an nga ang iyang bana maoy nipusil patay kang Villarin apan alas 6:20 sa buntag na nakasulti si Maano sa silingan.

Nahadlok siya niadtong higayuna nga mosumbong sa kapulisan.

“Suko ning bana kay dugay naman daw na ilang relasyon. Nagselos, naabtan pa gyud niya nagdulog maong gipusil,” dugang ni Rondina.

Si Rondina nibutyag nga ang managtiayon negusyante og mga lamas sa merkado publiko sa lungsod.

Si Villarin gidala unta sa Tuburan District Hospital apan gideklarar nga dead on arrival (DOA).