Kapulisan padayon sa ilang pagpangita sa lima ka mga children in conflict with the law (CICL) nga apil sa 20 nga ninglayas sa Cebu City Operation Second Chance facility niadtong Sabado sa gabii, Abril 9, 2022.
Matod ni Police Lieutenant Colonel Janette Rafter, hepe sa Operations Branch sa Cebu City Police Office (CCPO) nga na rescue na ang 15 ka CICL ug nabakabalik na sila sa pasilidad.
Tungod niini, nag-umol na ang CCPO og tracker team aron matultolan asa na ang laing lima nga padayon pa nga wala makit-i sa mga awtoridad.
“As of now, we were just informed by Station 9 commander, there are already 15 CICL ang na rescued out of the 20. So gamay-gamay nalang. Naa na lay lima. So hopefully with the tracker team as days go on makompleto gyud nato ni pag rescue,” matod ni Rafter.
Niadtong Sabado sa alas 8 sa gabii, atol sa pagbunok sa uwan, nahitabo ang pag layas sa 20 ka mga menor sa Operation Second Chance nga maoy hinungdan nga daling nanawag sila sa kapulisan aron ma rescue.
Dali nga ninglusad og hot pursuit operation ang kapulisan apan pipila lang ang na rescue pagbalik samtang ang uban nakalayas.
Ang hepe sa Guadalupe police station, Police Major Jonathan dela Cerna, niangkon nga ang 20 ka mga CICL nagplano na gyud nga molayas sa pasilidad sa maong adlaw.
Iyang gibutyag nga nagdalag mga binugha ang mga bata ug dayong hasmag sa gate sa dihang adunay usa sa ilang kauban nga dalhon unta sa tambalanan tungod kay naglisud sa pagginhawa.
Tungod kay usa ra ang gwardya, na over power kini hangtod nga malampuson nga nakagawas ang 20 ka mga menor.
Dili lang kini makausa ka higayon nga nahitabo ang paglayas sa mga CICL diin naghimo nag pamaagi ang Kagamhanan sa Siyudad sa Sugbo nga masulosyonan kini.
Matod ni Rafter nga magtagbo ang kapulisan ug ang nagdumala sa pasilidad aron dili na masubli pa ang nahitabo.
Kasagaran sa kaso sa mga bata nga ninglayas nalambigit sa illegal nga drugas.