Di na kapugngan nga mosamot na paglambo ang ekonomiya sa Sugbo ug sa Kabisay-an ning pagbukas na unya sa ikatulo nga taytayan nga magdugtong sa isla sa Sugbo ug sa isla sa Mactan nga mahitabo karong buwana. Wa pa hinuoy pinal nga petsa kon kanus-a buksan ang Cebu Cordova Link Expressway (CCLEX).
Atong nasayran nga gihuwat sa Cebu-Cordova Link Expressway Corp. (CCLEC) ang kompirmasyon sa ilang imbitasyon kang Presidente Rodrigo Duterte nga gitinguha nilang maoy pormal nga mobukas sa 8.9 kilometros nga taytayan nga mamahimo na unyang bag-ong landmark sa Pilipinas.
Ning nagpadayon nga kampanya alang sa piniliay sa Mayo, adunay mga nagpaluyo og kandidato sa pagka-senador ilang gipatuo nga ang P30 bilyones nga taytayan usa ka proyekto sa administrasyon ni Presidente Rodrigo Duterte. Kini tungod kay nagbuntaog kini nga proyekto ug daghan ang mangagi niini gikan sa Kabisay-an ug Mindanao dayag nalang nga ilang gamiton aron mohumot ang usa ka kandidato unya modugang sa iyang suporta.
Ang CCLEC maoy nagpatuman sa pagtukod sa proyekto ubos sa Metro Pacific Tollways Corporation (MPTC) nga maoy unang nakapahigayon og “toll road project” gawas sa Luzon diin sila maoy “toll road arm” sa Metro Pacific Investments Corp. nga sakop sa Manny V Pangilinan Group of Companies. Isip usa ka pribadong kompaniya, ilang gituman kon unsa may mga balaod nga gilagda sa gobyerno aron maoy ilang sundon.
Kon sa gobiyerno pa kini nga proyekto, dili unta kita mobayad sa atong pag-agi sa taytayan apan kay pribado man, mobayad kita sa matag agi sa dapit gamit ang “all-electronic toll collection system” alang sa luwas ug sayon nga pabiyahi gikan sa dakbayan sa Sugbo ngadto sa Mactan. Wa pay presyo kon pila ang mabayran niadtong mga sakyanan nga moagi sa taytayan.
Di na lang unta nato bakakan ang katawhan kon kang kinsa kini nga proyekto aron lang ang usa kandidato madugangan ang iyang suporta kay ang mga Sugboanon di mailad kon parte na sa mga kandidato ang hisgutan sa ilang pilion karong sunod buwan.
Mas maayo pa idiga sa mga nagpaluyo sa kandidato sa pagka-senador ang ubang mga proyekto ug programa nga nahimo sa Sugbo nga iyaha sa gobyerno aron masayod ang katawhan nga aduna siyay resibo sa iyang pangalagad ug ning bahina posibli ang mga Sugboanon manabi pa nga angay siyang paluyohan sa iyang kandidatura. (josephelvirtubilan@gmail.com)