HUMAN gibutang sa Alert Level 1 sa Covid-19 classification ang halos tanang lugar sa Pilipinas, aduna na say hadla sa bag-ong "surge" o pag-arangkada niini.

Niadtong Abril 8, gipadayag sa World Health Organization (WHO) nga mokusog na sab ang pagkuyanap sa pandemya sulod sa duha ka bulan. Ang hinungdan, matud pa sa ilang eksperto mao ang pagselebrar sa Semana Santa sa mga Kristiyanos ug Ramadan sa kaigsuonan natong Muslim.

Tambag ni Dr. Rajendra Yaday, nga acting-WHO representative sa Pilipinas, sa mga Balikbayan ug kadtong mobalik sa ilang mga probinsiya nga magsul-ob kanunay og maskara ug magpa-booster shot na.

Nagtakdo usab ang pamahayag sa WHO ug sa Octa Research Group tungod sa nakita nilang pagsaka sa ihap sa nasakit ilabi na diri sa Mindanao.

Matud pa nila nga gikinahanglan nga ipadayon ang pagbakuna sa gitawag nga "priority groups" nga wala pa mapabakunahi sama sa mga senior citizens ug kabus nga banay.

Sumala sa ilang datus, niabot na'g 66 porsyento sa mga Pinoy ang kompleto nang napabakunahan apan daghan pang mga edaran nga wala pa. Hinuon, gibutang nga "low risk" ang Metro Manila hasta sab ang pipila ka sentrong siyudad sa nasud.

Sa laing bahin, gibantayan usab sa Department of Health ang kusog kayo nga mokuyanap nga Covid-19 variant nga gitawag og "XE variant" nga niigo sa nasud nga Thailand ug unang nakita sa Estados Unidos ug United Kingdom. Matud pa sa mga doktor nga dunay nga rason nganong mobalik pag-arangkada sa virus.

Kini mao ang dili magpabakuna, pag-ubos sa epekto sa bakuna, gamay nga ihap sa nagpa-booster shot, pagsulod sa bag-ong "variant", dili madutlan sa bakuna ug ang dili pagsunod sa "minimum health protocols."

Ang dakong pangutana kung motuo pa ba ang tawo niining bag-ong "variant" sa virus? Kung atong mahinumdoman nga mora ta'g natuliling sa gibalita nga kuyaw daw kaayo nga Delta ug Omicron variants. Kusog daw kining motakod ug makapatay sa tawo. Apan sa katapusan, nakita diay kini nga way kalainan sa orihinal nga virus.

Ikaduha, sobra na ka-busy ang Pinoy sa taliabot nga piniliay nga mora'g nakalimtan na sa kadaghanan ang pandemya. Kung atong lantawon ang mga rally sa kandidato, mora na sab og mga piniliay sa kaniadtong panahon nga wa pa ang Covid.

Panahon na sab nga makabawi ang mga negusyante sa ilang lugi samtang naburyong na ang kabataan sa pagpuyo sa balay nga way mabuhat.

Busa daghan nang mga ginikanan nga nag-ampo nga mobalik ang face-to-face nga eskuwela aron makita na sa personal sa atong mga anak ang ilang klasmeyt nga dugay nang wa makita.

Hinuon, di nato mabasol ang WHO ug DHO sa padayong pagtambag kanato sa angayang buhaton aron dili mataptan sa maong sakit.

Ang nakaagi sa seryusong klase sa Covid ang makaingon nga sakto ra ang atong kagamhanan nga nag-lockdown ug nag-istrikto nga mosuroy ang katawhan. Busa bisan niapil kita sa rally o nagtrabaho, ato gihapong likayan nga magsobra ang atong pagdikit sa tawo ilabi na kadtong may sakit nga gibati o wala magtaptap og maskara. Basin maulahi ra ang tanan.