“DING maldang minuna kaya at ding memanuki gilasyo da,
“’osana ning Mambang nang Dabid.”
“Nwan ya ing daratang king Lagyu ning Ginu!”
‘osana king kakataskatasan!”
~ Mateu│Dangka 21: Sunis 9 (Matthew 21:9)
“Nwan ing panyatang ning kayaryan ning ibpang Dabid!
‘osana king kakataskatasan!”
~ Marku│Dangka 11: Sunis 10 (Mark 11:10)
“Kabang darayu de reng sundalus, dekapan de i Simun Pedru, a paratang manibat king balayan, at pepapusan de ing kurus kaya at pepadala de king kagulutan nang Yesus.
Dakal a tau ding tinuki kaya, kambe ring kababaynan a pakapaldas at manangis para kaya.
Binalikid ya i Yesus at nagna karela, “Kambang ning Yerusalem, e yu ku panangisan; mangais kayu para karing sarili yu at ding anak yu.”
Pauli ning ing panaun dating nung nu yu sabyan, “Nwan la ring kababaynang alang supling, ding atsan a e milamnan at ding salung e papasusu!”
Kanita “’Sabyan da karing bunduk “Mibwal kayu kekami!” at karing bulubundukan, “Takpan yu kami!”
Uling nung gawan do ring tau ding bage a reti kabang aluntyan la ring impun tanaman, makananu nung malangi na la?”
Ding adwang aliwang lalaki, tulisan la, teyiran da la naman bang miparusan.
Ampat miras la king dane mibansagang Bungu, pinaku de karin, kambe ring tulisan—ing metung king dane nang wanan, at ing aliwa king dane nang kayli.
Nganang sinabing Yesus, “Ibpa patawaran Mu la, uling e da balu ing daraptan da.”
At pipitna-pitna da ing imalan na kapamilatan ning bangkilas.”
Ding memalen manalbe lang pakatikdo, at ding pekapun pigsisti da la. Ngarang sinabi, “Linigtas na la ring aliwa; dapat iligtas na mu naman ing sarili na nung tutwanan a ya ing Talapangabus, ing Metung a Mepili.”
Ding sundalus minukyat la at pigsisti da ya. Inampangan deng aslam at ngara, “Nung ika pin ing ari da ring Udyus, iligtas mu ing sarili mu.” Ating makasulat a kapabalwan king kabuntukan na a mababasa: “Iti ing Ari Da ring Udyus!”
Metyung karing tulisan a makabite karin pituya-tuya ne: “E wari ika ing Talapangabus? Iligtas mu ing sarili mu at ikami man!” Dapot ing metung a tulisan selabatanan ne. “E ka tatakut king Dyos?” ngana.
Uling ati ka king milupang atul?Mipaparusan tamung makatud, uling akakwa tamu nung nanu ing karampatan. Dapot ing taung ini ala yang agawang kamalyan.”
Kaybat ngana, “Yesus, ganakan mu ku potang muli ka king kayaryan mu.” Mekibat ya i Yesus, “Tutwanang sasabyan ku keka, ngeni mituki ka kanaku king paraiso.”
Paugtu na kanita, at ing dalumdum dinugpang laganas king mabilug a labwad, Angga king katlu ning gatpanapun, uling tinuknang yang sislag ing aldo. At ing tabing ning pisamban mepitna yang makaladwa.”
Ginulisak ya i Yesus, “Ibpa karing gamat mu daraun ke ing diwa ku.” Kaybat na nita, ya na ing tawli nang pamangisnawa. Ing pekapun, kapanakit na king nung nanu ing milyari, pinuri ne ing Dyos, “Bitasa makatalaru ya ing taung ini.”
Ginulasyo ya i Yesung asna kasikan, “Ibpa karing gamat mu yampang ke ing sarili ku.” Kaybat na niti ya pin na ing tawli nang inawa.
Kapanakit da king milyari ding mekasaksi king milyari. Digdug da la ring salu da at meko na la.”
Dapot deng makibalu kaya, pati na ring kababaynan a tinaluki kaya ibat king Galileya, tinikdo lang malaut, alben da la ring bage deti.
-- Lukas | Dangka 23: Sunis 26-29 (Luke 23: 26-49)
***
Meging banal ing Maleldo uli nang Ginung Yesukristo─ding aral na, ing pamanuru na king pamaglugud at pamagsuyu king Ibpang Kakataskatasan─king mabilug a pusu, mabilug a isip at mabilug a kaladwa tamu. E ya meging banal uli ning pangapaku na king kurus. Banal ne manibat king kamumulan uling ing tula, ligaya at kapuryan ning Ibpa ya mu ing buri nang daptan. Ing sablang dpat na makadaun at makasuglung king lugud na king Ibpa. Nung mipaku ya man king kurus e uling kaburyan ning Ibpa ita, nung e kaburyan da ring mapangarirya at marok a pilublubang lelangan. E tutung ing Ibpa yang maki-kaburyan a mipaku ya ing Ginung Yesukristo.
Ninu wari ing malugud a pengari ing bustan neng magdusa ing kabubugtungan nang anak? Ala. Kapamatulusan da mu reng maling pamisip ita uling anti karing dalit, mipasyag a “Kapamilatan ding Nwan a Lagyu ning Ginu” mikabus ta mu na. Ing Banal a Kasulatan mamutaktak ya karing sunis a sasambitla kaniti. “Ing Nwan a Lagyu ning Ginu yang makasaup kekatamu.”
Ing turu ding mapilang manimunu king Banal a Pisamban, “alang ulaga ing pamagsalbat” o “papamarusa king sariling katawan”. Lakwas maulaga ing sisyan ing kasalanan at e na ulit-ulitang daraptan pa.
***
Dake Talabaldugan:
milalaklakan (pangdiwa) mipanakmul, mipamangan, susubu da’t akmulan ing balang metung. English – eating or swallowing each other. Alimbawa king pamangamit: “Asna ku kakarug inyang menakit kung milalaklakan a dapu uling bala ku aku na ing arapan da’t laklakan.”
milalako (pangdiwa) makalako, midarayu, mabubura. English -- disappearing, gets lost. Alimbawa king pamangamit: “E kanu milalako ing sakit na dungus Saring inya dela da ne keng albularyung patapal-tapal a mekapaldan kaya kanita.”
***
Mikasing-kabaldugang amanu tamu
Manyaman – mamye tula at ligaya king dila o panamdam panglasa. Makabye gana king pamamangan. Buri tamung kanan uli ning lasang mayap.
Malinamnam – bina kanyaman inya pin e mu buring tuknangan kanan, dapot makasuya nung mipalabis. Alimbawa: piga ning ungut. Nung ditak mu asna kanyaman, dapot nung miparakal mangapatilak na ka.
Malasa – labis king lasa o nyaman inya asna kaburi mung kanan.
Makatakam – sasasal ing panglasa o ing dila inya mipapatakam ka uling bala panagalan mu lasa ing nyaman ning pamangan.
Makapangayat wawa – marine ka man, bala mipapatulu ka wawa agyang akakit mu kabud at e mu man tatakman. Lawe mu kakanyamanan na ka.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.