Human sa duha ka mga tuig nga pagpalta, mahibalik na sugod karong Abril 18, 2022 ang Powerplay Basketball Training Camp.
Ning higayuna, ang maong training camp, nga gidumala ni kanhi PBA player Larry Villanil, adto na ipahigayon sa Mactan Gym sa Barangay Mactan, dakbayan sa Lapulapu.
Gipahibawo ni Villanil, kinsa nahimo usab nga assistant coach sa Cebu Gems kaniadto, nga limitado lang ang slots sa nahisgutan nga camp ug ilang ipatuman ang first-come, first-serve nga pamaagi.
Kini gitumong aron paghashas sa mga batan-on nga adunay abilidad ug potensiyal nga mamahimong sikat nga basketbolista sa nasod.
Ang Powerplay nga nagsugod dul-an sa 20 na ka tuig ang nakalabay, nakaumol na og inilang mga magdudula nga anaa na sa mga dagkong liga karon.
Ang training session himuon matag Lunes, Miyerkules ug Biyernes sa alas dos sa hapon.
Tungod sa dugay nga panahon nga wala'y napahigayon nga kalihukan sama niini, gilaumang dali ra nga mahurot ang slots ning maong training camp.
Alang sa mga interesado, mahimong mokontak lang sa 0923-565-6206 alang sa dugang detalye.