Tulo na lang sa 20 ka mga menor de edad nga child in conflict with the law (CICL) ang padayon pa nga gipangita sa kapulisan human ning-eskapo gikan sa Cebu City Operation Second Chance niadtong Sabado sa gabii, Abri 9,2022.
Kini ang gibutyag ni Police Major Jonathan Dela Cerna, hepe sa Guadalupe Police Station, human nga 17 na ang nabalik.
Una nang narekober ang pito ka mga menor ug nadugangan og walo sa Lunes.
Laing duha ang nabalik sa Martes human naluwas sa Pardo Police Station uban sa Women and Children Protection Desk sa Cebu City Police Office.
“Pulos na-recover nato ning 17 ka mga minors. Ato ning gipang-adtoan sa ilang mga balay gyud ug maayo na lang nga ang ilang mga ginikanan, ila pud gi-turnover,” matod ni dela Cerna.
Dunay awhag si dela Cerna sa tulo nga nagpabiling gawasnon pa ngadto na sa ilang mga ginikan nga mas labing maayo nga sila ang mopahibawo sa kapulisan o Operation Second Chance Rehabilitation Center aron sugaton.
Nagtuo si Dela Cerna nga kining mga menor de edad gipangmingaw hinungdan nga nangeskapo.
Ang Guadalupe Police Station igo lang moimbestigar nunot sa pagsibat sa mga menor, wa silay gahom pagpasaka og mga kaso batok sa responsable sa pag-eskapo.
“Actually ang involved ani City employee man gyud na dinha, wala tay hold niana. Pero naghimo gihapon ta og investigation kon kinsa ang duty niadtong tungora,”dugang ni dela Cerna.
Kasagaran sa mga nangeskapo nalambigit sa illegal drugs.
Ang mga menor nagdala og mga bunal niadtong Sabado sa gabii ug nilampos sa paggawas sa gate kay duna lay usa ka gwardya ang pasilidad.
Di kini unang hitabo nga dunay mga menor nga nakaeskapo gikan sa pasilidad, kay nahitabo usab kini sa miaging tuig.
Ang kapulisan makigtagbo sa kadagkuan sa pasilidad ug mga opisyal sa Dakbayan sa Sugbo aron kini kahimoag lakang, sa ingon di na masubli.