Nikabat og P19.3 million nga balor sa illegal nga drugas ang nasakmit sa kapulisan sa Central Visayas sa usa ka adlaw nga Synchronized Enhanced Managing of Police Operations (SEMPO).
Nagsugod ang dungan nga operation sa tanang police offices lukop rehiyon 7 sa alas 12:01 sa kaadlawon sa Abril 9 ug natapos sa alas 12:01 sa kaadlawon sa Abril 10, 2022.
Sa datos nga gipahibawo sa Police Regional Office 7, nakalusad silag 114 ka anti-illegal drug operations, diin 163 ka mga drug personalities ang nasakmit ug pagka sakmit sa dul-an duha kilo sa gituohang shabu nga adunay street drug price (SDP) nga P13,015,064.
Ang labing daghan og nasakmit sa illegal nga drugas mao ang Cebu City Police Office nga adunay 1.3 kilos sa gituohang shabu.
Lakip na ang mga malampuson nga pag-ibot sa liboan ka punoan sa marijuana sa bukirang dapit sa dakbayan sa Sugbo.
Gawas sa shabu, nakasakmit usab ang kapulisan og dul-an 53 kilos nga marijuana nga mokantidad ang tanan og P6,336,000.
Matod ni Police Brigadier General Roque Eduardo Vega, hepe sa Police Regional Office 7 (PRO 7), nga dako og natampo sa ilang malampuson nga anti criminality and law enforcement operation mao ang tabang sa komunidad.
Tungod niini, ila pa nga palambuon ang ilang pakig-alayon sa publiko aron ang mga nalambigit sa illegal nga kalihukan sa kabarangayan ilang madakpan.
“The strong support and positive community-police relations have helped us in the success of the operation and reducing crime in the Visayas,” matod ni Vega.
Ila usab nga gihingusgan ang ilang kampanya batok loose firearms.
Sila nakalusad og 135 ka operations nga niresulta sa pagkasakmit sa 222 ka armas nga way lisensya ug duha ka eksplosibo ug 216 usab ka wanted persons ang ilang nadakpan.
Moabot usab sa 278 ka mga sugarol ang ilang napusasan ug nakuha ang P20,186 nga pusta, lakip na ang illegal gambling paraphernalia.
Gimandoan pa ni Vega ang tanang city ug provincial police office directors nga hingusgan pa nila ang ilang anti criminality campaign.
Usa sa ilang target nga mapuhag ang criminal gangs sa Central Visayas nga gikabalak-an nga magamit sa Mayo 9, 2022 nga piniliay.
KANHI
Kanhi masahista ug kanhi waiter sa usa ka kan-anan nasikop sa buy-bust sa kapulisan.
Si Police Lieutenant John Kennedy Pajantoy, team leader sa Police Drug Enforcement Group (PDEG) Visayas Special Operations Unit (SOU 7), uban ang mga operatiba sa Parian Police Station, Regional Intelligence Unit, Regional Intelligence Division (RID 7) ug Philippine Drug Enforcement Agency (PDEA 7), nironda sa Sityo Serias, Barangay Lorega San Miguel, Siyudad sa Sugbo.
Didto nasikop sila si Jurafe Ramirez, 36, kanhi masahista, ug Nicole Sanchez, 18, kanhi waiter.
Nasakmit sa buy-bust ang 215 gramos sa gituohang shabu nga mokantidad og P1.4 million base sa SDP.
Samtang ang bag-ong regional chief sa PDEG-SOU Visayas nga si Police Lieutenant Colonel Lymel John Pasquin nibutyag nga kapin sa usa ka semana nga gisundan sa iyang mga sakop ang kalihukan ni Ramirez.
Ang ilang tagsa ka partner naa sa Cebu City Jail.