Walo ka mga bata ang na-rescue gikan sa sapa dihang kalit nga nidako ang tubig sa Guadalupe river nga nag-uwang sa Brgy. Capitol Site ug Brgy. Guadalupe, dakbayan sa Sugbo pasado alas 2:00 sa Martes sa hapon, Abril 12,2022.
Dali nga girespondehan sa Cebu City Fire Office personnel ug rescue squad sa Cebu City Disaster Risk Reduction Management Office ug naluwas ang walo ka mga menor de edad nga nag-edad og 14 ngadto na sa 16 anyos.
Ang mga menor de edad managlahi og rason kon nganong niabot sila didtong dapita apan usa sa mga nakahinabi sa Superbalita Cebu niingon nga duna lang unta silay adtuon nga barkada.
Apan sa ilang pag-adto wala didto ang ilang giduaw busa namauli sila.
Sa ilang paglabay sa sapa sa Guadalupe, nagkasinabot silang magbarkada nga mangaligo hangtod nga wala damha nga nikusog ang sulog sa tubig hinungdan nga nanga-trap sila sa riprap duol sa taytayan nga nag-utlan sa Guadalupe ug Capitol Site.
Dunay nakakita sa mga bata nga naglangoy-langoy nga maoy nipahibawo sa hingtungdan ug gihimo dayon ang rescue operation.
Usa sa mga ginikanan sa mga menor nabalaka og maayo nga nipaingon sa barangay hall sa Capitol Site dihang iyang nakit-an ang iyang anak sa live sa SunStar Cebu nga maoy gi-rescue.
Nagkabadkabad siya og dagan padung sa barangay hall, gibiyaan ang iyang trabaho.
Ang tanang mga personnel sa CDRRMO ubos sa pagpangu ni CDRRMO head Anderson Comar nagpadayon sa pag-monitor sa sitwasyon sa palibot nunot na niining pagsige og uwan dala sa bagyong Agaton.