(Hulagway iya ni Cristelle Alfanta)
(Hulagway iya ni Cristelle Alfanta)

Taxi driver giputla’g dila

Taxi driver giputlan og dila sa giingong duha ka mga tulisan sa ala 1:00 sa kaadlawon sa Martes, Abril 12, 2022 sa may Brgy. Pitalo, lungsod sa San Fernando, habagatang Sugbo.

Ang duha ka giingong mga tulisan nipahatod gikan sa Banawa, Brgy. Guadalupe, Dakbayan sa Sugbo ngadto sa San Fernando.

Ang biktima mao si Andres Alfanta, 52, taga Brgy. Cantao-an, dakbayan sa Naga, driver sa Hadjie Taxi.

Si Alfanta malampusong naoperahan sa doktor sa Cebu South Medical Center, kanhi Talisay District Hospital, pinaagi sa pagtahi og balik sa dila nga giputol sa giingong tulisan.

Si Police Corporal Mario Paul Pino, imbestigador sa San Fernando Police Station nga nahinabi sa Superbalita Cebu, nagkanayon nga wala pa nila mailhi ang duha ka mga tulisan nga gihulagway ni Alfanta nga hingkod ang panuigon apan wa niya maklaro ang mga nawong kay naka facemask ug nagkawo.

Ang duha giingong dunay armas ingon man kutsilyo.

Matud ni Pino nga naglisod sila kay si Alfanta di pa makasulti og tarong gumikan sa samad sa dila.

Apan nibutyag kini nga padulong na siya mopauli sa dakbayan sa Naga dihang gipara siya sa duha ka mga tawo sa may Banawa, Guadalupe.

Nagpahatod kini kaniya sa San Fernando ug nisanong na lang sab siya kay padulong siya mogarahi.

Sa ilang pag-abot sa unahan og gamay sa barangay hall sa Pitalo, ang mga tulisan ningdeklarar og tulis dayon gitiunan siyag armas ug kutsilyo.

Gipasulod siya sa usa ka eskinita nga duol sa Poblacion ingon man sa barangay hall sa Pitalo.

Didto nakuha ang iyang kapin sa P4,000 nga kita.

“Wala maputol tanan iyang dila, Sir, nahiwa sa tunga. Basin sa pagkisi-kisi sa biktima, gituok man gud ni, nidiwal ang dila, naigo sa kutsilyo,” dugang ni Pino.

Si Pino nagkanayon nga subayon nila ang dapit sa pamasin makakuhag ebidensiya.

Makig-ayon sab sila sa Police Station 9 sa Cebu City Police Office (CCPO) aron makakuhag impormasyon.

Ilang paabuton nga maayo na si Alfanta kay dakog ikatabang ang dugang impormasyon nga mahatag niini.

Si Alfanta nakatawag pa sa iyang pamilya sanglit wala madala sa mga tulisan ang iyang selpon

Sa post sa Facebook sa iyang anak nga si Lovely Alfanta, 26, ang iyang amahan naghilak nga nagmaniho sa taxi padulong sa hospital.

Wala siya dawata sa pribadong tambalanan sa dakbayan sa Naga hinungdan nga nilahos siya sa ospital sa Talisay.

Matod ni Lovely nga nagkadugo ang baba sa ilang amahan samtang naningkamot nga makaabot sa tambalanan.

Si Cristelle, laing anak ni Alfanta, niingon nga ang naputol nga bahin sa dila diha ra sa baba sa ilang amahan.

Naninguha kini nga di matagak bisan sa pag-agas sa dugo.

Malampuson kining natahi pagbalik atol sa operasyon sa doktor.

Matod ni Cristelle sa Superbalita Cebu nga nanginahanglan sila og tabang kay ang iyang amahan duna pay tulo ka gagmay nga mga anak sa kapuyo niini nga laing babaye.

Kon duna pay dautang nahitabo sa ilang amahan, makaluluoy ang iyang mga manghod.

Busa samtang di pa makamaneho og balik og taxi ang ilang amahan, nagkinahanglan sila og tabang kay way laing gisaligan ang pamilya niini.

Related Stories

No stories found.
SunStar Publishing Inc.
www.sunstar.com.ph