MOKABAT sa P14 milyunes nga balor sa illegal drugs ang nasakmit sa Philippine Drug Enforcement Agency (PDEA) 7 ug kapulisan sa managlahing mga operasyon.
Lakip sa ilang nasikop ang magtiayon nga giingong bigtime drug pusher sa syudad sa Talisay nga giingong gaway kaniadto sa giingong drug lord nga si Franz Sabalones.
Sa laing operasyon, mokabat sa P9.4 milyunes nga balor sda marijuana ang naibot usab sa PDEA 7 ug kapulisan sa bukirang dapit sa dakbayan sa Sugbo.
Nakadawat og tawag sa telepuno ang PDEA 7 gikan sa usa ka concerned citizen sa Barangay Tagbao nga dunay tinanum nga marijuana sa duha ka mga sitio sa maong lugar.
Nakig-alayon dayon ang PDEA 7 sa kapulisan sa syudad sa Sugbo ug Central Command aron ilang pang ibton ang mga punoan sa marijuana.
Alas 6 sa buntag ilang girumbo ang sitio Mapa, Barangay Tagbao.
Kapin sa duha ka oras ang gilakaw sa mga operatiba una nila naabot ang maong lugar ug ilang nakita ang kapin 14,000 ka punoan sa marijuana nga gibana-bana nga mobalor og P5,660,800.
Pagka alas 10:30 sa buntag nakasakmit na usab sila og kapin sa 8,000 ka punoan sa marijuana sa sitio Guardia sa samang barangay nga mobalor og P3,352.000 nga walay tawo nga ilang nadakpan.
Tungod sa kadaghan sa mga punoan sa marijuana nakahukom ang mga operatiba nga didto nalang sunogon tungod sa kalayo niini sa karsada nga nahimutangan sa ilang mga sakyanan.
Magtiayon
Magtiayon nga kanhi gaway sa giila nga usa sa labing dako nga drug lord sa Central Visayas nga si Sabalones ang nasikop sa buy bust operation sa PDEA 7 pasado alas 9 sa Martes sa gabii.
Ang nasikop mao silang Mesael Palermo, 35, ug iyang asawa nga si Janice, 29, taga Barangay Lagtang, siyudad sa Talisay.
Nakuha gikan sa ilang posisyon ang 11 ka dagkong pakete sa gituohang shabu nga motimbang og 600 gramos nga gibanabana nga mobalor ang tanan og P3 Million.
Matod ni Leia Albiar, tigpamaba sa PDEA 7, nga tulo ka semana nilang gipanid-an ang illegal nga negosyo sa magtiayon ug sa dihang nasuta nga positibo nga namaligya, ilang gilusad dayon ang buy bust operation.
“Kining duha considered gyud ni sila nga high value target. In fact, naa jud ni sila sa atong watchlist unya base sa information, tawo ni sila ni Franz Sabalones,” matod ni Albiar.
Gipasabot ni Albiar nga human niundang sa iyang illegal nga negusyo si Sabalones, nipuli usab ang mga gaway niini sama sa maong magtiayon diin ila pang gisubay kon asa sila magkuhaan sa supply sa illegal nga drugas.
Samtang P1.6 milyunes ang balor sa illegal drugs nga nasakmit sa Cebu City Police Office (CCPO) sa ilang Oplan Pokemon.
Ang mao nga drugs nakuha nila gikan sa 59 ka drug personalities nga ilang nadakpan. (AYB, GPL & Carmen Burias-CNU Intern