Upat ka hugna sa anti-illegal drug operations ang gilusad sa kapulisan sa dakbayan sa Sugbo ug Talisay atol sa Huwebes Santo.
Tulo ang nangadakpan sa gabii sa Huwebes Santo sa unang buy-bust nga gilusad sa kapulisan sa dakbayan sa Sugbo sa usa ka drug den.
Pasado alas 11:00 sa Huwebes sa gabii, ang mga operatiba sa Police Drug Enforcement Group (PDEG) Visayas Special Operations Unit ninglusad og buy-bust sa N. Bacalso Avenue sa Barangay Poblacion Pardo, Siyudad sa Sugbo nga miresulta pagkasikop ni Joel Gabrillo, alyas Suwang, 42, taga 543 Brgy. Poblacion Pardo, kanhi plumber. Si Gabrillo maoy target sa operation kay siya usab ang giingong operator sa drug den, matod ni Police Lieutenant John Kennedy Pajantoy, team leader.
Nasikop usab sila si Maryjane Autor, 37, taga sityo Filtersite ug uyab nga si Cerelo Decoriza, 39, taga sityo Mangga, pulos taga Brgy. Tisa, Siyudad sa Sugbo.
Samtang pasado alas 12 sa kadlawon sa Biyernes Santo, ang kapulisan sa Labangon Police Station nilusad sab og buy-bust sa dan Banawa, Barangay Labangon, Siyudad sa Sugbo.
Ilang nasikop si Robert Lanchica, 29, residente sa Mhel Hills sa Barangay Lahug ning siyudad.
Nasakmit gikan kang Gabrillo ug Lanchica ang shabu balor og kapin sa P200,000 base sa street drug price (SDP).
Kasong kalapasan sa Republic Act (RA) 9165 o Comprehensive Dangerous Drugs Act of 2002 ang atubangon sa mga nangadakpan.
Samtang duha usab ka buy-bust sa Biyernes Santo ang gilusad sa kapulisan sa dakbayan sa Talisay, diin tulo ang nasikop.
Unang nadakpan si Lindol Obal Regner, alyas Puloy, 38, usa ka sikad drayber, taga Sityo Puntod,Barangay Mambaling, Siyudad sa Sugbo.
Si Regner nadakpan sa Sityo Iba, Barangay Lawaan 2, dakbayan sa Talisay sa alas 8:34 sa Biyernes Santo sa gabii ug nasakmitan og drugas balor og P68,000 ug armas nga .38 caliber revolver nga dunay tulo ka mga buhing bala.
Samtang sa ikaduhang hugna sa buy-bust pasado alas 10:00 sa gabii sa Noel St., Barangay Mohon, nasikop sila si si Ralph Benedict Lugo, 36,taga Sityo Mohon, Barangay Tisa ug kauban niining si Ranie Jay Rondina, 24.
Nasakmit gikan kanila ni Lugo ug Rondina ang shabu nga mokantidad og P136,000 ug .38 kalibreng revolver nga dunay lima ka buhing bala.
Matud sa hepe sa Talisay City Police Station, Police Lieutenant Colonel Randy Caballes, nga ang ilang nangadakpan nalambigit usab sa pagpangawat sa Dakbayan sa Sugbo ug silingang mga siyudad apan karon niapil na sa illegal drugs.