“Dapit pisyag nang Samwel:
“Matula ya wari ing Ginu karing depugang ampang
at daun kasing ulaga ning kapamintwan king siwala Na?
Lawen yu, ing kapamintwan lakwas mayap kesa keng daun,
at ing katingiran lakwas mayap kesa king taba ding tupa.”
~ Mumunang Aklat nang Samwel * Dangka 15: Sunis 22
(1 Samuel 15:22)
“Uling pagnasan ku ing pakalulu kesa king daun,
at ing belwan king Dyos kesa king dilukang ampang.”
~ Oseya * Dangka 6: Sunis 6
(Hosea 6:6)
“Dapot ume ka at pakibalwan nanu ing kabaldugan na nini:
“Pagnasan ku ing pakalulu, e ing daun.
Uling dintang ku e bang awsan la ring matalaru, nung e ding makasalanan.”
~ Mateu * Dangka 9: Sunis 13
(Matthew 9:13)
“... at ing luguran Ya king mabilug mung pusu at king mabilug mung pamisanak
at king mabiluyg mung sikanan, at ing luguran ya ing para mung tau
anti king pamaglugud mu king sarili mu lakwas maulaga kesa
karing medapug a daun at karing daun.”
~ Marku * Dangka 12: Sunis 33
(Mark 12:33)
***
Tinagun yang misa king Bakulud ing kekayung abe Kapisik napun. Subali king Santa Ana, Arayat, Magalang at Minalin, metung ya karing balen a delawan na ya pin iti at mekirandam ya king aral na ning pari a sinabing, “Ing Katoliku mu ing kasalpantayanan a nung nu ing menatagan migdusa ya para kekatamung talasalpantaya.”
Simbitla na la ring aliwang kasalpantayanan. Ing Buddhism ngana, “I Gautama Buddha e ya linasa o dinalang kasakitan para karing talatuki niti.”
King Islam, e ya naman migdusang migpakasakit ing menatagan a i Mohamat o Muhammad para karing talatuki na o para kaninu man.
Kabang mangwa yang larawan king talindiking ning pisamban, balabalaus ya pa mu rin king aral na ing pari at ita ing paparas na karing sisimba at aliwang makarandam*a ing Katoliku mu kanu ing kasalpantayanan nung nu ing menatagan linasa ya para karing talatuki na. Mekad simbitlan na la pa ring aliwang kasalpantayanan. E na na dindam ning Kapisik.
Makanyan man, mitanam king isip na niting Kapisik ing buri nang ipayabut at ipasanak karing makarandam ingb sinabi na. Sabyan ta’nang tutu iti, mangabaldugan wari a ing kegiwan a sukat atin ya ing pekapun o menatagan ning kasalpantayanan ya pin ing pamilasa na o pati na kamatayan nang masakit? Masakit pin?
Kutang: Nung e ya magkasakit o linasa wari ing Ginung Yesukristu buri na sabyan wari e ne karapatdapat manimunu? Ita wari ing kegiwan a kaylangan? Tanu mong e linasa, buri na sabyan ning talapanaral alang ulaga ing penuru na king amanu, isip, pusu at dapat Kristo? Makananu ing tula, ligaya at lugud a kisna ya ing Ginu*ala nang ulaga ite? O Ing Nwan a lagyu ning Ginu*alang ulaga?
E malating bage ing kasakitan. Maulaga iti at e milalako ulaga anting maulagang sangkap ning kasalpantayanan dapot e mu iti ing maulaga. Nukarin mababasa a ing kasakitan ya mung kegiwan a malyaring agyu ning ninu man a sukat daptan na bang magi yang banal o mikakarapatan muli king Ibpa? E sukat danasan iti ba’mung maging banal anti ing Ginung Yesukristu.
Alang makasulat king Biblya a iti mu ing sukat danasan bang makauli king kayaryan ning Ibpa. Katapatan, kapakumbaban, kapamintwan at lugud, maulaga ngan bang makapaligaya king Ibpa at pati na kang Ginung Yesus.
Ing pamanyamba king o karing Lagyu ning Kakataskatasang Ibpa tune binang maulaga inya sa’t mamayutputan ya king pamanyambitla dikil king Nwan a Lagyu ning Ginu ing Biblya at aliwa pang Banal a Kasulatan. E mu ing pamilasa o pamagsalbat. Ding turu na karing amanu na, dapat na at mabilug a bye nang kisnang lugud yang tune dakilang daun nang Ginung Yesukristo king Ibpa na’t Ibpa tamu ngan bilang sangkan o’t mekilala yang pekadakilang talasuyu ning Dyos.
***
Dake Talabaldugan:
1. milalakad (pangdiwa) makalakad, makalibut, upayang makapunta karing aliwang dane, malapit man o marayu. English – has the ability to walk or travel. Alimbawa king pamangamit: “malati ya pa ing anak a Byeng dapot milalakad neng masalese at mabilis agyang alang mamantabe kaya.”
2. milalaku (pangdiwa) maglaku, maglakad miyayaliwang dane, balen o lalawigan bang mamisaling lati-lating bage. English – selling, vending little items or wares (perhaps cheap ones) as one goes from one place to another; business of an ambulant vendor; ambulant selling. Alimbawa king pamangamit: “Deng mangatwang magbaliwas kanita la pa milalaku karing larawan ding santu karing miyayaliwang balen o lalawigan king mabilug a bangsa.”
3. milalakwan (pangdiwa) maglakwan, mitatagan, maglakwan bage, bakas o panalala. English – leaving something behind, perhaps some thinhg or things, trace or memories. Alimbawa king pamangamit: “Milalakwan mapait a lasa ing pamamangan nang nanu mang mayumung pamangan balang kaybat na kanung mengan Paing inya sa’t mangayayat ya uling ing pamamangan na masisira pauli nita.”
***
MIKASING-KABALDUGANG AMANU TAMU
1. Gulasyo – matas at masikan a siwala pauli ningkapagnasang marandam, mapansing o agyang pamipasyag mu ning pamanyalungat, sakit lub o matikding mwa, lungkut o kaligaligan.
2. Gulyo – amanung magagamit a kasingkabaldugan ning gulasyo mu naman dapot magagmit karing makatwa ning balen libutad Kapampangan.
3. Gulait – gulayit karing aliwa. Mangabaldugang matas at masikang siwala, dapot malyaring bang mung makayaus pansing.
4. Gulisak – mengari king gulasyo, dapot binang masikan, malalam at mabinit a kapanamdaman ing sangkan. Makaba iti pauli na mekad ning malalam a panamdaman.
5. Gakgak – makuyad a pamitas ning siwala; mararapat e mu karing tau nung e pati na aliwang lelangan.
6. Gaga –matikding kapanamdaman a bunga ning matikding lumbe, mwa, kaplas lub o kaligaligan.
7. Aklis – mengari king gulasyo, gulisak o gulyo dapot malagad mung magagamit king kasalungsungan, dapot magagamit pa mu rin king pamamasa karing Banal a Kasulatan o king puni.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.