Dunay mga tawo nga di ganahan magpabukid ug moagi sa medyo lisod nga agianan kay mahadlok. Busa naa lang sila sa karsada nagbiseklita, sagad sa highways. Apan ang ilang gipili mountain bike, di road bike.
Klaro kaayo nga wa ayuha og huna-huna kon unsa nga klase sa biseklita ang iyang gikinahanglan.
Ang biseklita gihimo subay sa unsay iyang gamit ug katuyoan. Naa gani na sa iyang ngan daan. Dunay uban nga nipili sa mountain bike kay mas barato kuno. Well, depende sa imong brand ug set-up. Kon mopalit ka og inila nga bike brand ug mag carbon fiber, mahal gyud na kaayo nga road bike.
Apan mahimo kaayo nga mangita ka og used nga frame sa road bike, kanang Italian brands nga naa sa 90s o late 80s. Mangamigo ka og mga tawo nga suhito ini aron ka magiyahan asa ka makapalit. Imo ning butangan og group sets nga igo-igo sa imong budget, duna ka nay nindot nga road bike.
Kon ganahan ka magpa bukid, mosubay sa trail o semi-trail nga mga agianan, go for a mountain bike, bisan hardtail ka lang magsugod, although mas advisable ang full suspension MTB.
Sa di ka pa sab mopalit sa bisan asa ini nga matang sa biseklita, pag research unag maayo. Naay daghan nga bike 101 sa Youtube o bisan sa Google. Gikinahanglan nimo mahibaw-an kon unsa ang imong sukod sa frame. Maora baya sab nag senina ang biseklita.
STRESS BUSTER
Daghan kaayo ang ganahan mosuroy sa bisan asa nga dapit nga layo sa kagahob o kalangas sa siyudad. Apan pila ra may maka afford og biyahe. Wa pa ni labot sa dakong oras nga gikinahanglan nimo sa layo nga travel.
Nganong mobiyahe ka pa man og layo kon duna kay MTB? Sakyi ug tungas sa kabukiran o kon di ka pa anad, praktis og tungas, bahalag magtulod ka sa imong biseklita. Ang unang mga buwan ray lisod ana.
Madugayan maanad ka ra. Mo-improve ka man gyud magkadugay kon kada adlaw kang mosikad, sama sa akong gibuhat kaniadto.
Mas maayo sab nga mangita ka og mga barkada nga pareho nimo og hilig aron maka guide nimo.
Tan-awa nya, kon makat-on ka na og climb, diha ka na makaamgo kon unsa diay kaanindot sa mountain biking. Dako kaayo ni og matabang sa stress. Ayaw lang sab sigeg upgrade aron di ka ma stress pangitag kwarta.
NAKATABANG
Sa kasakit sa akong gibati pagkamatay sa akong anak, ang mountain biking maoy akong gidangpan aron malingaw ko. Dako kaayo ni og gikatabang sa akong biyahe sa kagul-anan.
Daghan kaayo ko og naila-ila nga mga tawo nga hilig kaayo og biseklita. Diha ra sab ko nakakita og mga tawo nga kahibawo mosabot ug maminaw nimo.
Lahi ra gyud kaayo kon ang imong kalingawan biseklita kay gawas nga makahibag ka og daghang mga higala, makakita ka sab og daghang maanindot nga mga talan-awon, sama sa nagbawod nga kabukiran, bugnaw nga kakahoyan ug limpyo nga kasapaan.
Imo usab nga madiskobre ang lamian nga mga kan-anan sa kabukiran nga barato kaayo itandi sa siyudad.
Mahimo sab nga kon duna kay taas nga mga adlaw nga magamit, sama sa long weekend, biyahe og layo, sama sa Camotes kay segurado kang malingaw kuyog sa imong mga higala. Di ka na gyud ma-stress.