Nagkaanam kaalegre karon ang dagan sa pulitika sa Lalawigan sa Sugbo.
Ugma, iisa ni kanhi senador Ferdinand ‘Bongbong’ Marcos Jr. ang kamot ni Gob. Gwen Garcia atol sa dakong BBM-Sara rally diha sa SRP. Inig ka Huwebes sa rali sa mga Kakampinks diha sa Syudad sa Mandaue, si Vice President Leni Robredo na sab ang moisa sa kamot ni kanhi tourism secretary Ace Durano.
Kini human nagkasinabot si Gob. Garcia ug ang One Cebu nga mosuporta kang Marcos sa asembliya sa One Cebu sa miaging Martes. Ato usab nasayran nga hilom nga gipanday sa miaging semana ang panaghiusa sa kampo ni Robredo ug Durano basi sa Cebu Priority Development Agenda (CPDA).
Daghan kini og mga detalye ang maong istorya. Salig ko sa atong kauban sa media dinhi sa Sugbo nga motuki ug motaho niini.
Apan mas interesado ko sa epekto sa maong mga kalamboan sa pulitika sa Lalawigan sa Sugbo.
Di ko motuo nga si Kong. PJ Garcia mobiya sa iyang igsuon. Apan, makapahak kang Marcos ang iyang pagkampanya kang Manila Mayor Isko Moreno. Alegre sab kining Tersero Distrito kay ang Promdi nilang Gaie Yapha mokampanya alang kang Sen. Manny Pacquiao.
Apan mapugngan ba kaha ni Gob. Garcia ang pagbalitok ngadto sa Leni-Ace-Junjun Movement ang mga sakop sa One Cebu nga nagsuporta kang VP Leni? Mahibaw-an ta kana sa sunod nga mga adlaw padulong sa Mayo 9.
Pabor-pabor sa CCMC
Diha nako nabasa kini dihang gi-award ang Phase 4 sa Cebu City Medical Center (CCMC) ngadto sa ME Sicat sa Marso 11.
Mao sab kini ang adlaw nga gibalibaran ang Motion for Reconsideration sa CE Padilla. Matod pa, ang maong pagsalikway nahitabo alas 5:08 sa hapon. Kini bisan pa og duna pa untay pito ka adlaw ang CE Padilla alang sa ilang protesta.
Atong nasayran nga ubos sa Section 57 kabahin sa mga protesta sa mga desisyon sa Bid and Awards Committee nga kining mga protesta dapat maresolba sa dili pa maisyu ang award. Nihuwat gyud unta ang BAC og labing menos pito ka adlaw.
Dayon dunay pagtugot ang maong kalambuan ni Mayor Mike Rama. Buot ipasabot, gipugos gyud ang maong pag-award sa ME Sicat.
Giingnan pa gyud ni Mayor Rama ang mga kawani sa CE Padilla nga tugtan ang mga representante sa ME Sicat nga moinspeksyon sa project site.
Kay nakaapil man unta ang CE Padilla ug nakadaog sa ubang mga phases sa proyekto, kahibudngan nga gipahamtangan og dugang mga requirements kini.
Tuyo karon sa CE Padilla nga mausab ang decision sa BAC ug sa maong kalamboan, mahimong makatigom pa ngadto sa P100 milyones ang Cebu City Hall.
Nasiguro ko nga kining labing ulahi nga kontrobersiya makalangay pa gyud sa pagtiwas sa CCMC. Abi gyud nako og nagdali si Mayor Rama. Apan, karong mga tulo na lang ka semana mag-eleksyon na, nagduda ko nga lahi na ang prayoridad sa mayor.
Kon buot huna-hunaon, si Mayor Rama gyud ang nangusog nga magtukod og bag-ong edipisyo human naigo ang CCMC sa linog kaniadtong 2013.
Kadugay na intawon niadto. Nagtuo ko nga karong termino na nilang Mayor Mike Rama, mapaspas na unta ang pagtiwas sa pagtukod sa bag-ong edipisyo. Apan, di man diay gihapon.
Si Mayor Rama man gihapon ang nagmugna og kontrobersiya aron madugay og samot ang maong proyekto. (DM nako @anol_cebu)