Magtiayon nga giingong mga sakop sa usa ka bigtime budolbudol syndicate group napusasan sa kapulisan sa dakbayan sa Talisay human nabiktima ang duha ka mga tawo niadtong Huwebes Santo sa buntag ug hapon sa Barangay Tabunok, dakbayan sa Talisay.
Gihulagway sa kapulisan sa dakbayan sa Talisay nga ang magtiayong Velbeth Fernandez, 44, ug bana niining si Warren Fernandez, 50, mga sakop Fernandez swindling syndicate nga nasuta nga nag operate, di lang sa Sugbo, lukop nasud sab diay.
Sagad sa mga sakop niini mga kabanay nga Fernandez, lumad nga taga Barangay Binongkalan,lungsod sa Catmon, amihanang Sugbo.
Matud ni Police Lieutenant Colonel Randy Caballes, nadakpan ang magtiayon alas 2:00 sa kaadlawon sa Biyernes Santo, Abril 15, sa usa ka follow-up operation uban ang Catmon Police Station, sa ilang gipuy-an sa lungsod.
Matud ni Caballes nga sila nipahigayon og hot pursuit operation human ningdangop sa ilang buhatan ang managlahi nga mga biktima aron pagreklamo nga pulos sila mga biktima sa budolbudol niadtong buntag ug hapon sa Huwebes Santo.
Si Caballes nitumbok sa duha ka managlahi nga mga insidente sa budol sa alas 10:45 sa buntag ug alas 2:00 sa hapon sa nahisgutang adlaw.
Ang una nahitabo sa Barangay Tabunok ug ang ikaduha sa Barangay Linao.
Ang usa sa biktima nga si Vallere Nicholle Gulles, 20, estudiyante, nidangop sa Talisay City Police human niya nadiskobrehan nga siya nabudol ug nadagit ang iyang usa ka cell phone nga nagkantidad og P13,000.
Matud ni Gulles nga niadtong Huwebes Santo, duna siyay kasabot nga kustomer sa iyang ginagmay nga negusyo.
Sa iyang pag-abot sa Barangay Tabunok, si Velbeth kalit nga niduol kaniya ug nangayo og pakitabang.
“Excuse me, Dai, pwede mangayog tabang nimo kon asa dapit ang Abarquez para daw mo rent para og sakyanan kay ilaha daw, naguba,” kutlo ni Gulles sa sulti ni Velbeth kaniya.
Dugang ni Gulles nga si Velbeth nipaila nga taga Daanbantayan ug supplier og mga buwad.
Gisuwayan pa gani ni Gulles nga magpatabang og usa ka traffic enforcer nga anaa sa ilang duol apan nibalibad si Velbeth ug gipalayo pa hinuon siya sa traffic enforcer.
“Niana siya ayaw lang, Dai, dayon gibira ko niya para dili ko makaestorya. Ako unta siya suphon apan gikuptan man ko niya. Nikalit og sulod dayon ang usa ka lalaki nga mao ning si (Warren),” dugang ni Gulles
Si Warren kalit lang nibutho ug apil usab nga gipangayoan og tabang kunohay ni Velbeth apan kunohay nibalibad ang lalaki kang Velveth ug niingon nga daghang badlungon sa lugar apan si Velbeth nipugos sa pagpangayo og tabang kang Warren.
“Naluoy sad ko siyempre kay first time to nga naka encounter ug nangayog tabang. Mao niingon sad ko nga sige tabangan ta ka pero igo ra ihatud,” dugang niini.
Samtang nilabay ang pila ka minuto, si Warren nibalik sa agi ug niduol pagbalik kang Velbeth ug niingon nga duna siyay nakit-an nga rent a car.
“Niana ang lalaki nga, Maam, naa bayay daghan ahente didto. Kawatan unya imo bag kay daghan kag kwarta. So, ibilin lang na sa babaye which is ako kuno,” pasabot ni Gulles.
Si Velbeth nihatag kunohay sa iyang gamit ngadto kang Gulles ug wala mag dugay nangutana kini kang Gulles nga pwede bang ibilin niini ang iyang gamit ngadto na kang Gulles.
Apan si Warren nisapaw sa estorya ug giingnan si Gulles nga ibilin ang cell phone kang Velbeth aron mosalig kaniya.
Aron mas mosalig si Gulles kang Velbeth, kunohay gibilin pud ni Warren ngadto sa ginang ang iyang cellphone ug P1000 nga kwarta ug ATM card.
Samtang sa lahi nga oras, alas 2:00 sa hapon laing biktima ang giigo sa magtiayon.
Si Angeline Rosales nakuhaan og cellphone nga nagkantidad og P17,000 ug pitaka nga dunay sulod nga P2,000.
Base sa imbestigasyon sa Talisay City Police Station, usa ray nihimo sa duha ka mga insidente busa ila dayon nga giimbestigar.
Si Velbeth niangkon nga dugay na nga katuigan kini nila nga gibuhat ug ingon sa naadik na siya sa maong trabaho.
Si Velbeth nihangyo sa publiko nga dili magpabiktima kay walay mangingilad kon walay magpailad.
Sa pakisusi sa Talisay police, si Velbeth nadakpan na niadtong 2017 sa Capiz ug sa Bukidnon, Isabela sa 2018.
Nasikop usab siya sa Mandaue 2018 ug samtang sa 2021 sa lungsod sa Liloan.
Duna usay mga ningtumaw nga mga panghitabo nga sila gihapon ang nibiktima sa dakbayan sa Naga ug Carcar.
Matod sa kapulisan nga 15 ka tuig nang nag-operate ang Fernandez swindling syndicate lukop nasod.