MAINGON sa mga nakasaksi sa hitabong bangga nga dunay gyod anghel ang bata human nga luwas kini samtang ang inahan ug amahan niini nga sakay sa motorsiklo ang namatay.
Ang isidente nahitabo pasado ala una sa hapon, Huwebes Santo, Abril 14, 2022 didto sa Purok 7, Barangay Southern, Panabo City.
Dead on the spot ang mag-asawa nga sila Chito ug Ronalyn Casakit samtang luwas ug naa sa ospital ang ilang anak nga si Ychiro, usa ka tuig ug lima ka bulan nga bitbit sa magtiayon sa wala pa ang disgrasya.
Makonsidera nga milagro ang nahitabo sa bata human nakahiagom lamang kini og mga pangos nga di kaayo grabe.
Subay sa inisyal nga imbestigasyon sa traffic section sa Panabo City Police Station, sakay ang magtiayon sa motorsiklo ug dala nila ang bata.
Giingong misungag ang motorsiklo sa usa ka pickup kay milikay kini sa dagkong bangag sa kalsada.
Wala nabantayan sa drayber sa motorsiklo nga kasugat niini ang pick-up gikan sa pikas linya hinungdan sa duguong disgrasya nga misangko sa kamatayon sa magtiayon.
Hinuon daling mitahan sa kapulisan sa Panabo ang drayber sa nasampit nga pick-up samtang ang patay nga lawas sa mga biktima ang gipahiluna na sa ilang mga kabanay.
Sukad sa pagsulat ning balita kagahapon sa hapon, anaa na sa luwas nga kahimtang ang bata nga daw dunay abyan nga Anghel.