Nikabat sa 11 ka disipulo sa tigbakayan sa presinto sa kapulisan natanggong human nadakpan sa pagpangronda sa awtoridad sa Sitio Bangko, Barangay Valencia, dakbayan sa Carcar, alas 12:45 sa udto sa Sabado, Abril 16.

Si Police Lt. Col. Ardioleto Cabagnot, hepe sa Carcar Police Station nga nahinabi sa Superbalita Cebu, nagkanayon nga nakadawat sila og tawag gikan sa nagpakabana nga residente.

Sa pagsubay nila sa dapit, ubay-ubay sa mga sugarol ang nanagan apan, ang 11 ilang nasikop sa ginukdanay ug nakasibat ang ubang sugarol.

Hinuon, sumala sa kapulisan sa Carcar, sa kinatibuk-an malinawon ang ilang dakbayan atol sa pagsaulog sa Semana Santa gawas sa tigbakay, usa ka drug pusher ang ilang napusasan.

Ang mga sugarol nga nasikop sa tigbakayan mao sila si Tereso Laugan Genelaso, 32, Sitio Tal-ut, Brgy. Valencia, Carcar; Desiderio Apao Genelaso, 30; Isias Semilla Genelaso, 54; James Unabia Campañon, 23, Sitio Takdog, Brgy. Poblacion 3, Carcar; Glenn Dadibalos Jacalan, 38; Gary Quijano Unabia, 35; Denand Macahipay Paragoso, 22, Sitio Tal-ut, Brgy. Valencia, Carcar; Ryan Abella, 34, Brgy. Can-asujan, Carcar; Martin Alemio Benoya, 29, Sitio Takdog, Brgy Poblacion 3, Carcar; Johnny Gellicania Geligan, 34; ug Rito Waper Cañares, 44, Sitio Simon, Brgy. Can-asujan, Carcar.

Samtang at-large sila si Kirby Pardillo alyas “Butchok”, Sitio Simon Brgy. Can-asujan, Carcar; JV Pardillo, taga Sitio Simon, Brgy. Can-asujan, Carcar; ug Rey Gabisan, taga Brgy. Can-asujan, Carcar.

Narekuber sa kapulisan ang tulo ka manok igtatari nga mga samaran, upat ka buwang, ug P320 nga pusta.