Daw sama sa uso nga nakuratan ang Memphis Grizzlies sa gipakitang kabangis sa Minnesota Timberwolves sa Game 1 sa first-round Western Conference series sa

National Basketball Association (NBA) kagahapon didto sa Memphis, Tennessee.

Gikuniskunis sa ngipon sa Timberwolves ang Grizzlies, 130-117, aron makawat ang home-court advantage gikan sa mas inilog nga No.2-seed Memphis.

Nangisog si Anthony Edwards sa iyang unang postseason game pinaagi sa 36 puntos nga maoy nagdala sa Minnesota sa kadaogan.

Grabe pud nga nakaduwa ang bigman sa Timberwolves nga si Karl-Anthony Towns, mikamada kini’g double-double nga 29 puntos ug 13 ka rebounds.

Samtang si Malik Beasley miamot og 23 puntos, midugang og 15 puntos si Jaden McDaniels, samtang si Patrick Beverley ug D’Angelo Russell mihatag og 10 puntos matag usa.

“Putting on another show,” matod pa ni Edwards, ang top overall pick sa 2020 draft. “That’s it. Putting on another show and impact winning.”

Hapit duha ka dekada ang gipaabot sa Timberwolves aron makuha ang ilang unang playoff opener win sukad niadtong 2004.

Matod pa ni Towns nga ang kadaogan mihatag og taas nga self-confidence kanila alang sa Game 2 karong Miyerkules.

“We did a lot of little things that are needed to win,” batbat ni Towns . “We should be very proud of our performance.”

Si Ja Morant maoy nangulo sa Memphis sa iyang 32 puntos ug walo ka assists. Mitunol ug 24 puntos si Dillon Brooks, samtang si Brandon Clarke adunay 13 points ug 12 rebounds gikan sa bench.

“We tried our best to stay ready, but it’s been a minute since we played,” sigon ni Memphis coach Taylor Jenkins. “But we have to come out ready to go. We didn’t in the first quarter, and we paid for it.”