Gusto ka makat-on og self-defense?

Sakto nga higayon karon kay adunay martial arts summer clinic nga gipahigayon ang Yaw-Yan Ardigma Philippines ug Muaythai Association of the Philippines nga gipangulohan ni Master Benigno “Ekin” Caniga Jr.

Dul-an gatos ka mga batan-on ang mosalmot sa summer clinic karong adlawa, Abril 18, sa Barangay Day-as Sports Complex, New Imus Road niining dakbayan.

Ang clinic libre alang sa lumolupyo sa Barangay Day-as isip proyekto ni Caniga aron makalikay sa dautang bisyo ang mga batan-on sa ilang lugar.

Sugdan karong adlawa ang clinic og matapos sa Mayo 30.

Ang maong proyekto gipangulohan ni Day-as Barangay Captain Freddie Esmas ug gisuportahan sa Barangay Day-as Council ug Sangguniang Kabataan.

Tinguha usab ni Caniga, konsehal sa Barangay Day-as, nga makadiskobre og bag-ong talento sa MMA sa ilahang lugar og mapadala unya sa Central Visayas Regional Athletic Association (Cviraa), Batang Pinoy ug Philippine National Games.

Sa iyang tuig sa MMA daghan na og nadiskobre si Caniga ug nakaduwa kini og dagkong torneyo

Alang sa mga batan-on nga dili taga Day-as, pwede sila makasalmot sa lahi nga summer clinic ngadto mismo sa Yaw-Yan Headquarters sa Sanciangko Street, atbang sa University of Cebu (UC) main campus.

Sa mga interesado pwedeng motawag sa 0943 656 8900 alang sa dugang impormasyon.