Way record sa barangay sa Catmon Police Station ang mga sakop sa budolbudol gang nga nasikop sa Talisay City Police Station niadtong Huwebes Santo, Abril 14, 2022.

Matod ni Police Lt. Teofilo Manlanat, hepe sa Catmon Police Station nga nahinabi sa Superbalita Cebu,nga walay bisan usa nga record sa ilang lungsod ang mga sakop sa giingong Fernandez Swindling Group.

Sumala pa ni Manlanat nga mismo ang kapitan sa Barangay Binongkalan, Catmon ug mga silingan nakugang dihang nasikop sila si Valbeth Compra Fernandez ug Warren Tampos Fernandez sa kapulisan sa Dakbayan sa Talisay human giingong gibiktima ang duha ka mga motorista sa dakbayan niadtong alas 12:30 sa udto ug alas 2:30 sa hapon sa Huwebes.

Matod ni Manlanat nga sa ilang pag-interview sa mga barangay opisyal, ang mga suspek gihulagway nga mga maayong tawo ug way record sa barangay nga nalambigit sa mga kasamok.

Ang mga suspek nga mga managparyente nagpuyo sa coastal area, sagad kanila mga mananagat.

Sa pagsusi sab nila sa record sa police station, wala silay nakita nga dunay kaso o warrant.