Maestro patay human nadisgrasiya sa iyang motorsiklo sa national road (Transcentral highway) sa Barangay Cansomoroy, lungsod sa Balamban kagahapon, Abril 17, alas 10:00 sa buntag.

Si Prudence Macasero Gabuya III, 37, minyo, maestro sa Inayawan Elementary School ug taga Sitio Mansanitas, Barangay Cogon Pardo, dakbayan sa Sugbo, dead-on-arrival (DOA) sa Balamban District Hospital.

Si Police Master Sgt. Eugene Taboada, imbestigador sa Balamban Police Station nga nahinabi sa Superbalita Cebu, nagkanayon nga ang biktima uban sa mga higala gikan nanuroy sa nahisgutang lugar ug padulong na mopauli paingon sa dakbayan sa Sugbo sakay sa iyang motorsiklo nga Kawasaki Ninja 300, plate no., GF42083.

Apan samtang nagkurbada siya sa Transcentral highway, nawad-an sa kontrol sa manobela ug gumikan niini, nabangga siya sa gutter sa karsada ug nabunal ang ulo hinungdan sa iyang kamatayon.

Ang biktima nadala pa sa tambalanan apan gideklarar og DOA gumikan sa grabing kadaot sa iyang ulo ug nawong.

“Sa kakusog sa impact, nalagpot iyang helmet ug naguba kaayo ang nawong sa biktima, apil sa ulo,” sumala ni Taboada.

Gibutyag niini nga ang biktima uban sa grupo niini nga “400 Ninja”.

Hilig sab sa grupo kining gitawag nga ‘benking-benking’ samtang mokurbada nga kusog sa pagpadagan.

Gibutyag ni Taboada nga daghan gyud kaayong riders ang manuroy sa nahisgutang lugar ilabi na kon weekend ug holidays.

Giawhag niya ang mga motorista nga mag-amping gyud kanunay labi na moagi sa Transcentral highway sa maong dapit.

Sumala pa niini nga ubay-ubay na sa nahisgutang lugar ang nakalas nga nagmotorsiklo.